Këtë vit, në skenën e Festivalit të Sanremos është rikthyer Ermal Meta, pas suksesit të vitit 2018, kur fitoi festivalin në duet me Fabrizio Moro me këngën “Non mi avete fatto niente”, si dhe pas renditjes në vendin e pestë në Eurovision Song Contest.
Me këngën “Stella stellina”, Meta sjell një histori që i referohet një fëmije të vrarë në Gaza gjatë një sulmi izraelit. Kënga nuk vjen si një baladë intime, por si një kompozim me ritëm të shpejtë, ku ndërthuren ngjyra latine me tinguj ballkanikë, duke reflektuar rrënjët e artistit dhe një dimension më popullor, pothuajse koral.
Nën këtë energji muzikore fshihet një nga temat më të rënda të këtij edicioni të festivalit: historia e një vajze palestineze pa emër, viktimë e luftës, e treguar përmes këndvështrimit të një burri që mban në duar kukullën e saj.
Lexo edhe:
Gjatë performancës, Meta u ngjit në skenë me emrin e një vajze palestineze, Amal, të shkruar në jakën e këmishës. Ai ka deklaruar se çdo natë do të ketë të shkruar në këmishë emrin e një fëmije palestinez.
“Protagonistja e ‘Stella stellina’ është një fëmijë pa emër, por ndoshta i ka të gjitha emrat. Aysha, Amal, Layla, Nour, Hind… ç’rëndësi ka? Ndoshta gjithçka, ndoshta asgjë. Fëmijë te askujt, fëmijë të të gjithëve”, shkroi Meta në rrjetet sociale pas performancës së tij, duke theksuar mesazhin e këngës.
