Rrjeti i supermarketeve Big Market duket se nuk e ka më problem abuzimin me qytetarë, duke përsëritur shpeshherë të njëjtën skenë mashtruese: në vitrinë çmimi i ekspozuar është me ulje, por kur shkon të paguash në kasë nuk është çmimi i ekspozuar, por më i lartë.
Kjo skemë është përsëritur sërish në prag të festave të fundvitit, kur qytetarët bëjnë blerje të shumta.
Sipas një denoncimit tek portali JOQ, e njëjta skemë ka ndodhur në supermarketin e ashtuquajtur “Big Europa” në Kamëz, ku sipas të dhënave, aksionet zotërohen nga deputeti socialist Vullnet Sinaj dhe znj. Monika Çela. Qytetarë të thjeshtë janë përballur në këtë supermarket me një praktikë që është një mashtrim i hapur.
Lexo edhe:
Birra Tuborg ishte e ekspozuar me etiketë oferte, por në momentin e pagesës në arkë, çmimi rezultoi të ishte ai fillestar. Me pak fjalë: oferta ekzistonte vetëm në letër. Një grackë klasike për konsumatorin, që shpreson të kursejë disa lekë dhe përfundon duke paguar më shumë, pa u paralajmëruar.
“Përshëndetje JOQ! Isha duke blerë birra në një market me emrin Big Prime në Kamëz dhe pashë ofertën e birrës Tuborg 99 lekë për copë. Kur vajta në arkë, pagova 109 lekë për shishe (fatura është e bashkangjitur). Më pas, nga inati, shkova në një market tjetër më tutje dhe bleva të njëjtën birrë te Big Europa (Big Market), ku oferta ishte reale dhe në arkë e pagova sipas çmimit të afishuar. Ju lutem, publikojeni këtë material, pasi i keni të gjitha provat. Gjynah për qytetarët!”, ka denoncuar qytetari për JOQ.
Ky nuk është rasti parë që ndodh në rrjetet e supermarketeve Big Market, pasi edhe më parë kanë qenë të shumtë qytetarët që kanë denoncuar të njëjtën skemë mashtruese.
