Gazetarja Bora Shahini ka ndarë publikisht përvojën e rëndë që kaloi në Pediatrinë e Përgjithshme të QSUT-së me vajzën e saj 10-muajshe, e cila kishte temperaturë që i afrohej 40 gradëve.
Përmes një rrëfimi të titulluar “Dhoma nr. 9”, Shahini tregon se vogëlushes iu shpuan dhe iu çanë disa herë venat gjatë përpjekjeve për t’i vendosur vigonin. Ndërkohë, temperatura vazhdonte të ngrihej dhe orët kalonin pa u gjetur një zgjidhje.
“Pesë orë që mua m’u dukën një jetë”, shkruan gazetarja, duke përshkruar ankthin e përjetuar teksa mbante në krahë vajzën që digjej nga temperatura.
Lexo edhe:
Shahini denoncon gjithashtu kushtet e dhomës ku qëndronin fëmijët: tri krevate të dëmtuara, dyshekë të konsumuar, mobilie të shkatërruara, dritare të prishura, vapë dhe mungesë të sistemit të ajrimit.
Por, sipas saj, edhe më shqetësuese ishte sjellja e disa pjesëtarëve të stafit. Gazetarja thotë se, kur kërkoi ndihmë, u përball me përgjigje të ftohta dhe mungesë komunikimi. E dëshpëruar, ajo e mori vajzën në krahë dhe zbriti në Urgjencën e Pediatrisë për të gjetur një infermiere që mund t’i vendoste vigonin.
“Ju lutem, më duhet një infermiere. Vajza ka temperaturë 40. Ka orë kështu. Më ndihmoni”, kujton Shahini. Sipas rrëfimit të saj, situata u tensionua deri në atë pikë sa një punonjëse kërkoi të njoftohej policia, me pretendimin se nëna po pengonte punën e stafit.
Ndihma erdhi nga infermiere Alda dhe doktor Tani, të cilët arritën t’i vendosnin vigonin foshnjës. Pas marrjes së mjekimit, temperatura nisi të binte dhe vajza më në fund fjeti.
Shahini vlerëson edhe drejtuesen e shërbimit, doktoreshë Numilën, dhe pediatren, doktoreshë Fridën, për profesionalizmin dhe kujdesin e treguar. Ajo sqaron se denoncimi nuk drejtohet kundër të gjithë mjekëve dhe infermierëve, por synon të tërheqë vëmendjen ndaj problemeve të sistemit.
“Prindërit që mbërrijnë në Pediatri me fëmijët në krah nuk kanë nevojë për arrogancë. Kanë nevojë për profesionistë, komunikim, përgjegjshmëri dhe njerëzillëk”, përfundon gazetarja.
Rasti i saj ngre sërish pikëpyetje për kushtet dhe standardet e shërbimit në spitalet publike, ku asnjë prind nuk duhet të detyrohet të endet nëpër korridore për të siguruar ndihmën mjekësore për fëmijën e tij.
