Fushatat më të fuqishme shëndetësore në Shtetet e Bashkuara kanë shpërthyer kundër gjigandit të industrisë së duhanit, Philip Morris International (PMI), duke e akuzuar për mashtrim publik dhe keqinformim flagrant lidhur me produktin e saj më të ri – IQOS.
Ky produkt i ashtuquajtur “më pak i dëmshëm” që ngroh duhanin në vend që ta djegë, po marketizohet agresivisht si alternativë më e shëndetshme ndaj cigareve, por realiteti është krejt ndryshe.
FDA nuk e ka cilësuar asnjëherë IQOS-in si të sigurt
Lexo edhe:
Sipas raportit të Reuters, PMI është duke u përpjekur të rikthejë në treg versionin e përmirësuar të pajisjes IQOS me një strategji marketingu që e paraqet atë si më të sigurt për konsumatorët.
Por faktet janë kokëforta:
FDA nuk e ka autorizuar asnjëherë që ky produkt të promovohet si më pak i rrezikshëm për shëndetin. Leja e dhënë më parë ka të bëjë vetëm me reduktimin e ekspozimit ndaj disa substancave kimike, por jo me uljen e rrezikut të sëmundjeve si kanceri apo sëmundjet kardiovaskulare.
Studimet: IQOS nuk e ul rrezikun – e shton varësinë
Sipas hulumtimeve nga Japonia dhe Koreja e Jugut, vetëm 15% deri në 30% e përdoruesve kalojnë tërësisht në IQOS. Pjesa dërrmuese vazhdon të përdorë edhe cigaret tradicionale krahas pajisjes së “ngrohur” – një praktikë që shton varësinë, ekspozimin ndaj nikotinës dhe rrit ndjeshëm dëmet në organizëm.
Dëmet që Philip Morris përpiqet t’i fshehë
Shkencëtarë dhe organizata mjekësore kanë vërtetuar efekte serioze shëndetësore nga përdorimi i IQOS, të ngjashme me ato të cigareve klasike:
- Inflamacion në mushkëri dhe dëmtime të rrugëve të frymëmarrjes
- Lëndime qelizore dhe rritje të rrezikut për kancer në mushkëri, gojë dhe fyt
- Dëmtime të mukozës së gojës dhe shenja paralajmëruese për kancer oral
- Efekte negative në sistemin kardiovaskular dhe rritje të mundshme të tensionit, arteriosklerozës dhe infarktit
Philip Morris akuzohet për manipulim të konsumatorëve
Grupet më me zë në mbrojtje të shëndetit publik, si Campaign for Tobacco-Free Kids, American Lung Association, dhe American Academy of Pediatrics, kanë kërkuar ndalimin urgjent të promovimit të IQOS me pretendime të rreme.
Ata paralajmërojnë se përdorimi i gjuhës së paautorizuar nga PMI është manipulues dhe i rrezikshëm për miliona qytetarë, sidomos për të rinjtë që joshen nga teknologjia dhe dizajni “luksoz” i pajisjes.
“IQOS nuk është shpëtim, është rrezik me flamur marketingu”
Ndryshe nga sa reklamohet, IQOS nuk është një rrugëdalje nga duhani. Është një formë tjetër e tij – e veshur me teknologji, por që mbart të njëjtat pasoja fatale.
Kërkohet ndërhyrje e menjëhershme për të ndaluar mashtrimin e Philip Morris dhe për të ruajtur shëndetin publik nga një tjetër gënjeshtër e industrisë së duhanit.
