Sonila Meço ka përfunduar eksperiencën e saj si opinioniste e Big Brother Vip, pas dy puntatash pasi zëvendësoi në këtë karrige Balina Bodinankun.
Në opinionet e saj ajo zbuloi një anë tjetër për publikun, përtej gazetares së çështjeve të nxehta të aktualitetit.
Në një status në rrjetet sociale ajo ka treguar se “kontrata” e saj brenda këtij formati ishte vetëm për dy puntata duke treguar ndjesinë që ka marrë në këtë format ndryshe.
Sonila Meço zëvendësoi Balinën, pasi kjo e fundit ashtu siç raportoi Vip Magazine, u infektua me Covid, duke iu nënshtruar karantinës 14-ditore
Nga spektakli i të martës, ajo do të rikthehet në krah të Arbër Hajdarit me komentet e saj pikante.
Reagimi i Sonila Meços:
Dy netët si e ftuar në Big Brother Vip nuk qenë zgjedhje e lehtë. Sepse, së pari profili im si gazetare aktualiteti dhe më rrallë si drejtuese programesh show nuk ish familjar për publikun në një format të tillë.
Së dyti, sepse angazhimi im me Task Force më ka vënë në timonin e një makine të shpejtë, aerodinamike, në kthesa të forta dhe pak shpërqendrim krijon problem me udhëtimin.
Së treti, sepse të hysh në mes të programit, kur ka fituar ritmin dhe frymën e vet duhet shumë kujdes e takt për të mos ndikuar thelbin tashmë të konsoliduar.
Dhe së fundi, sepse përfshirja emotive e publikut në këtë show është në kufijtë e toksikes duke rrezikuar sinorë të rëndësishëm të etikës dhe përftimit të realitetit.
Por pranova për tre arsye:
1. Sot më shumë se kurrë media ndikon koshiencën kolektive dhe rreziku prej papërgjegjshmërisë së ne njerëzve që bëjmë media dhe motiveve etike të publikut është i madh. Një shtrembërim hierarkie vlerash sot e këput shtyllën kurrizore të një kombi nesër.
2. Unë kam nevojë si njeri publik të përftohem edhe përtej “xhaketës” politike, debatit të rëndë të aktualitetit. Publiku e do njerëzor sot personazhin televiziv, sepse rrjetet sociale e kanë holluar shumë paretin ndarës mes teleshikuesve dhe njerëzve publikë e mediatikë.
3. Sepse e keqja dhe e padenja janë kaq “të nevojshme” për të ushqyer debatet ditore dhe i japin limfë salloneve televizive që mbajnë gjallë edhe personazhe sa politike, të aktualitetit, të artit e showbizit që me thashethemnajën kanë krijuar pasurinë e tyre.
Dhe patjetër një kortezi për disa miq të vjetër e më rishtarë në televizionin ku përjetova sukseset e para profesionale.
Por vetëm këto dy dalje qenë edhe pakti, sepse unë vijoj angazhimin ditor me punën time, që e dua fort.
Për të apasionuarit pas banorëve e programit u them se ka shumë rëndësi të kuptohet se pavarësisht se BB është një dalje në vitrinë e disa personazheve të njohur, sërish janë njerëz në një lojë. Të privuar fort nga privacia, nga informacioni dhe realja nuk mund të jetë kjo assesi jeta normale. Ndaj çdo ditë kanë betejë me instiktet që shtohen prej privimit. Por kanë edhe përgjegjësi, për të mirën e tyre…vijon në koment.
/Vip-Magazine.al/
