Prokuroria e Tiranës ka hapur hetime ndaj kompanisë farmaceutike Rejsi Farma të oligarkes së Shëndetësisë Merita Sheqit, e dyshuar për përfitime abuzive nga skema e rimbursimit të barnave dhe për futjen në treg të barnave që kanë kaluar afatin e skadencës.
Drejtoria e Hetimit Tatimor, duke u mbështetur në një raport të Kontrollit të Lartë të Shtetit mbi veprimtarinë e Fondit të Sigurimit të Detyrueshëm të Kujdesit Shëndetësor në procesin e rimbursimit, ka referuar gjetjet në Prokurorinë e Tiranës.
Në raport thuhet se grupi i kontrollit ka evidentuar 18 medikamente, në total 12,178 copë, me një vlerë prej 41,999,556 lekësh, të cilat dyshohet se kanë kaluar skadencën mbi një vit. Për këto barna nuk ekziston asnjë dokument apo proces-verbal nga autoritetet kompetente, dhe nuk është ndjekur procedura për nxjerrjen jashtë përdorimit, pa njoftuar Drejtorinë Rajonale Tatimore përkatëse dhe pa marrë miratim nga Agjencia Kombëtare e Barnave dhe Pajisjeve Mjekësore.
Lexo edhe:
Raporti thekson gjithashtu dyshimet për përfitime të paligjshme nga skema e barnave të rimbursueshme, duke mos i nxjerrë jashtë përdorimit dhe duke rrezikuar shëndetin e qytetarëve që marrin këto barna me rimbursim.
“Mungesa e dokumentimit dhe e veprimit sipas rregullave tatimore dhe kontraktuale për rimbursimin sjell risk në gjendjen reale të inventarit të barnave të rimbursueshme, si dhe në nivelin e rimbursimit të përfituar nga depo-importuesi Rejsi Farma, duke rritur rrezikun e rifutjes në qarkullim të barnave të skaduara për përfitime financiare, por me pasoja në shëndetin e pacientëve”, thuhet në raport.
Kompania dyshohet se ka mashtruar Fondin e Sigurimit të Detyrueshëm duke paraqitur dokumentacion të pasaktë për inventarin e barnave të skaduara.
Dosja po hetohet nga prokurori i Tiranës, Ndini Tavani.
Skandali më i madh në këtë mes qëndron në faktin se kjo kompani ka përfituar miliona euro nga instirucionet e shëndetësisë në tenderat për ilaçet duke gllabëruar kështu paratë publike dhe duke i dhënë të sëmurëve ilaçe të skaduara.
