Kreu i PS-së, Edi Rama pati ditën e sotme një takim me kandidatët e qarkut të Tiranës. Ajo që ra në sy në këtë takim ishte prezantimi që i bëri Rama një prej prurjeve më të reja në listën e PS, për të cilën nuk i kurseu fjalët e mira. Bëhet fjalë për Bora Muzhaqin, e cila renditet e 31 në listën e PS.
“Dua t’ja jap fjalën Borës, e cila është një nga shembujt më kuptimplotë të skuadrës sonë. Një studente shumë e zonja e kthyer qysh në krye të herës kur ne fituam mandatin e parë dhe sot është këtu si vijimësi e natyrshme e një procesi përfshirje dhe aktivizimi, pavarësisht se ju dha mundësi në fillim fare, që në administratë ajo të fillonte një punë, ishte vendimmarrja e saj për tu larguar dhe për të sfiduar veten në sektorin privat dhe është kënaqësi që e kemi në skuadër. Sot që kanë kaluar 7 vite e pak, ajo është këshilltare në institucionet tone, jo nga ne por nga një institucion financiar që asiston qeverinë tonë.”, -u shpreh Rama.
Duke qenë se Muzhaqi është një nga studentet që ka mbaruar shkollën jashtë dhe është kthyer në Shqipëria dhe më shumë ka punuar me të rinjtë, mesazhi i saj ka qenë pikërisht për ta, por nuk ka harruar pa përmendur edhe për prindërit e të moshuarit.
Lexo edhe:
“Dua të ndaj me ju eksperiencën dhe faktin sa e privilegjuar jam që jam këtu. Pas 7 viteve qeverisje tuaj, jam këtu me ju falë një nisme shumë të bukur “Deputeti që duam”. Shpresoj ti përfaqësoj denjësisht të rinjtë bashkë me ju.
Kam dëshirë që të rinjtë të bashkohen me mua, për të thënë që e vetmja mënyrë për të ndryshuar gjërat është duke punuar fort, ne nuk mund ta ndryshojmë Shqipërinë nga kafja, ti vendosim shpatullat punës për të ndryshuar gjërat. Jo vetëm të rinjve, këtë dua t’ua them edhe ju, prindërve dhe gjyshërve tanë, mos ndaloni së luftuari, na duhet mbështetja e të gjithëve. Duhet të vazhdojmë reformat”, tha Muzhaqi.
