Egla Ceno ka rrëfyer për VIP Magazine një incident të ndodhur gjatë takimit të kryeministrit Edi Rama në Berat, ku po diskutohej reforma territoriale.
Ceno tregon se ishte e pranishme si përfaqësuese e qytetit të Poliçanit, ndërsa në takim merrnin pjesë edhe qytetarë nga bashkitë Poliçan dhe Dimal.
Sipas saj, ministri Demo u dha fillimisht fjalën qytetarëve. Pasi folën dy prej tyre, Rama ndërhyri duke thënë se takimi nuk ishte organizuar për të dëgjuar “sa mirë jetohet në Poliçan”.
Lexo edhe:
“Pas 15 apo 20 minutash, gjatë të cilave shpjegoi përse duhej të bëhej reforma, kryeministri bënte pyetje, por nuk lejonte askënd të përgjigjej. E pyeta nëse do të na dëgjonte dhe ai më tha: ‘Dil jashtë’”, deklaroi Ceno për VIP Magazine.
Ajo thotë se iu përgjigj kryeministrit se ishte e gatshme të largohej, por i kujtoi se ndodhej aty si përfaqësuese e qytetit të saj.
“I thashë: ‘Po, po, edhe jashtë dal, por jam këtu si përfaqësuese e qytetit tim’. Më pas e pyeta nëse takimi ishte monolog apo dialog”, vijoi ajo.
Sipas rrëfimit të Cenos, Rama vendosi ta ndërpriste mbledhjen derisa ajo të largohej nga salla. Megjithatë, qytetarët e pranishëm u ngritën në mbështetje të saj dhe nuk pranuan që ajo të dilte e vetme.
“Komuniteti u ngrit i gjithi dhe nuk më la të dilja jashtë. Në fund dolëm të gjithë”, përfundoi Egla Ceno në reagimin e saj për VIP Magazine.
/Vip Magazine/
