Në podcastin e Grida Dumës, Linda Rei ndau për herë të parë historinë e saj të plotë nga hyrja dhe largimi i bujshëm nga Big Brother VIP Kosova. Ajo tha se ishte e përgatitur për formatin dhe e kishte pranuar si një test personal, por situata ndryshoi sapo hyri në shtëpi.
Linda rrëfeu se problemi nisi me pajisjen e saj të domosdoshme për matjen e diabetit të tipit 1, një sensor që sipas saj produksioni ia kishte premtuar se do ta siguronte para nisjes së spektaklit. “Ma kishin garantuar një muaj më parë. Në momentin që u futa dhe nuk ishte, kërkova të dal. Më mashtruan për një javë të tërë”, tha ajo, duke shpjeguar se gjendja i ishte rënduar deri në nivele shqetësuese të glicemisë.
Lexo edhe:
Sipas Lindës, reagimi i saj i ashpër në natën e parë nuk kishte të bënte me lojën, por me rrezikun real për shëndetin. Ajo shtoi se qëndrimi i produksionit i është dukur i orientuar drejt “show-t me çdo kusht”, duke nënvizuar se nuk pranon të bëjë spektakël me një sëmundje autoimune.
Linda foli edhe për qëndrimin e saj ndaj stafit të programit, duke përmendur producenten e programit të cilën e akuzoi për publikim të të dhëna private, përfshirë biletën e avionit me mbiemrin e saj. Ajo ngriti pyetjen pse nuk janë transmetuar asnjëherë pamjet e saj nga dhoma e rrëfimit, ku thotë se kishte sqaruar qartë situatën.
“Kam dalë nga shtëpia, kam hyrë në zyrat e tyre, kam takuar njerëz dhe prapë u përpoqën të më bindnin të kthehesha. Unë doja të ikja. Më mbajtën me zor”, tha Linda.
Gjatë bisedës, Grida Duma theksoi se shëndeti nuk duhet rrezikuar në asnjë format televiziv dhe se situatat e jashtëzakonshme kërkojnë trajtim të kujdesshëm.
