Që më 5 tetor të vitit 2021 Top Channel ka gozhduar para ekranit një publik të gjerë me reality show-n më të ndjekur në vendin tonë, “Big Brother VIP”. Shtëpia më e famshme në Shqipëri mbylli mbrëmë dyert, duke shpallur edhe fituesin e saj, Ilir Shaqiri.
Reality show që bëri të gjithë të flasin për të dhe që theu çdo rekord shikueshmërie, rezervoi mbrëmë shumë surpriza për katër finalistët dhe shumë emocione për publikun e gjerë.
Por që nga dita e parë dhe deri në finalen e shumëpritur, “Vëllai i Madh” ka bërë që banorët dhe publiku të përjetojnë emocione të forta dhe të pa përshkuara me fjalë. Yjet e këtij edicioni të parë të BB VIP kanë marrë surpriza e dhurata nga më të ndryshmet, ku shpeshherë kanë mbetur pa fjalë.
Më poshtë janë pesë momentet më emocionuese në “Big Brother VIP”:
Iliri kërcen më nënën e tij në Teatrin e Operas dhe Baletit, i ati i ndjek me lot në sy
Në finalen e madhe, “Vëllai i Madh” kishte rezervuar për balerinin e njohur një nga surprizat më të bukura dhe të veçanta. Iliri përjetoi emocionet më të forta kur në Teatrin e Operas dhe Baletit kërceu me nënën e tij, ndërsa i ati i ndiqte me lot në sy nga skena e madhe.
Pas shumë vitesh, Shaqiri së bashku me dy prindërit u rikthyen në TOB. Por jo vetëm kaq, pasi në skenë u ngjit edhe e madhja, Inva Mula, e cila këndoi për të tre.
Top Channel i bëri surprizën e madhe Arjola Demirit, i dhuroi një shtëpi
Pak ditë para finales së madhe, Arjola Demiri, mori surprizën e veçantë dhe që e dëshironte fort. Ajo gjatë gjithë rrugëtimit të saj në shtëpinë më të famshme në Shqipëri ka treguar vështirësitë që ka kaluar si nënë për të rritur 3 fëmijët e saj.
Por Top Channel i bëri një surprizë aktores së njohur. Fillimisht ajo u takua me fëmijët e saj, por pas pak minutash Arbana Osmani zbuloi se Arjola ka marrë dhuratë një apartament në zonën e Kodrës së Diellit në Tiranë për të jetuar me fëmijët e saj.
Takimi i Donaldit me vëllanë e tij binjak, Romeo dhe ‘rrengu’ që “Vëllai i Madh” u bëri banorëve
Dukej se publiku po e priste me padurim takimin e dy vëllezërve, Donald dhe Romeo Veshaj, brenda shtëpisë së BB VIP. E duhet thënë se “Vëllai i Madh” gjeti mënyrën më të bukur që të surprizonte Donaldin por jo vetëm.
Publiku e kërkonte prej kohësh që Romeo të zëvendësonte Donaldin, e të shikonin se si do reagonin banorët e tjerë. Do e kuptonin apo jo se është bërë një ndryshim?
Ai hyri në shtëpi, u takua me të vëllanë dhe më pas ndërruan rrobat dhe Romeo doli nga dhoma e rrëfimit e shkoi të ulej në vendin e Donaldit, pranë Beatrix. Kjo e fundit mbeti shumë e habitur dhe nuk tha asnjë fjalë, por ishte Einxhel ajo që e kuptoi ‘rrengun’ e BB VIP.
Beatrix Ramosaj në Pallatin e Kongreseve për të mbështetur të vëllanë, Albanin, në Festivalin e Këngës
Beatrix Ramosaj doli nga shtëpia e “Big Brother VIP” për t’u nisur drejt Pallatit të Kongreseve, aty ku i vëllai Albani do të këndonte këngën e tij për Festivalin e Këngës në RTSH.
Asnjëri nuk e dinte se çfarë i priste dhe emocionet ishin të forta për të dy. Pas fjalëve të bukura dhe mbështetëse, Beatrix shpërtheu në lot teksa shikonte të vëllanë duke kënduar. Pas performancës së Albanit, ata kanë mundur që të takohen në prapaskenë, ku emocionet kanë qenë edhe më të forta.
Letra e nënës së Einxhel Shkirës që emocionoi të gjithë
Einxhel Shkira është treguar shumë e fortë brenda shtëpisë së BB VIP, por letra e shkruar nga nëna e saj, bëri që ajo të tregonte anën e saj të brishtë. Në pamundësi për të shkuar pranë së bijës për shkak të problemeve shëndetësore, nëna i kishte shkruar një letër aq emocionuese sa moderatorja e njohur nuk i mbajti dot lotët.
Einxhel dëgjoi zërin e së ëmës teksa i lexonte letrën që i kishte shkruar, me fjalët më të bukura që çdo vajzë do donte t’i dëgjonte nga nënat e tyre.
“Ti je një vajzë e zgjuar, relative me shumë ëndrra dhe shumë e veçantë. U bënë disa vite dhe mua më vjen keq që nuk mund të kalojmë kohë me njëra-tjetrën.
Duke të të pasur ty në krah gjërat janë bërë më të lehta. Ndonjëherë mërzitem kur të shoh të debatosh por punë e madhe, jo të gjithë do të të duan. Shpirt, luaj por luaj me zemër, më gëzon shoqëria jote me Beniadën.
Sot po të lë këtë letër me shpresën se do të të shoh gjithnjë në ekran, të dua”, ishin disa nga fjalët që nëna i tha Einxhel. /GAZETA SHQIP/
