Duket se bota nuk po gjen qetësi për virusin e koronavirusit, ku së fundmi në Britaninë e Madhe është shfaqur një mutacion i ri i këtij virusi.
Deri tani raportohet se mutacioni i ri është 70% më shumë infektues se koronavirusi që është në qarkullim që prej vitit të kaluar.
Kjo ka bërë që shumë vende të mbyllin në mënyrë të menjëhershme kufijtë me Britaninë e Madhe, duke nisur nga Franca, Holanda, Irlanda, Belgjika, Austria, Bullgaria, Gjermania, Finlanda dhe Danimarka.
Mbrëmjen e së dielës ka pasur kaos në aeroportin e Londrës, teksa mijëra njerëz kanë tentuar që të largohen nga vendi, pas nisjes së ndalim-fluturimeve me shumë shtete të Europës.
Turmat e njerëzve ishin futur në terminalin 5 Heathrow për të pritur azhornimet e një fluturimi britanik drejt Dublinit. Pasagjeri Rachael Scully, 23 vjeç, shkroi në Twitter se Qeveria Irlandeze në fund dha “dritën jeshile” për fluturimin i cili ishte vendosur të nisej në 10:30 pasdite dhe u vonua disa orë me radhë.
Ky mutacion i zbuluar në Britaninë e Madhe ka kaluar edhe në Itali, ku së fundmi një pacient i ardhur nga ky shtet është zbuluar me versionin e ri të koronavirusit. Ai është izoluar menjëherë, ndërsa autoritetet italiane kanë sqaruar se mutacioni nuk është më shumë agresiv se i vjetri, si vaksina vazhdon të jetë efikase ndaj këtij virusi, i vetmi problem është se ai ka një shpërndarje 70% më shumë se versioni i vjetër.
