Një ngjarje e rëndë ka tronditur Francën, ku një influencuese 29-vjeçare është gjetur e pajetë dhe e djegur në një vresht në Saint-Gilles, pranë Arles, në zonën e Gard.
Trupi i Sonia Bellinës u zbulua më 12 gusht 2026 nga një punëtor ferme, i cili e gjeti të shtrirë mes rreshtave të hardhive. Menjëherë pas zbulimit, autoritetet nisën hetimet për vrasje.
Bellina, e cila kishte rreth 250 mijë ndjekës në rrjetet sociale, kishte dalë nga banesa rreth mesnatës për të takuar një burrë. Para se të largohej, ajo i kishte thënë motrës: “Po takoj dikë dhe kthehem menjëherë.” Pak kohë më vonë, telefoni i saj rezultoi i fikur.
Lexo edhe:
Fillimisht, autoritetet nuk mundën të përcaktonin identitetin e viktimës. Prokuroria bëri të ditur se bëhej fjalë për një grua të re, por nevojiteshin ekzaminime të mëtejshme për të konfirmuar identitetin.
Pas analizave të ADN-së dhe hetimeve të kryera nga autoritetet, viktima u identifikua zyrtarisht si Sonia Bellina.
Sipas BBC, në lidhje me ngjarjen janë arrestuar dy persona, pasi hetuesit kanë siguruar prova që dyshohet se tregojnë për përfshirjen e tyre, drejtpërdrejt ose tërthorazi, në ngjarje.
Autoritetet franceze po vijojnë hetimet për të zbardhur rrethanat e plota të vdekjes së 29-vjeçares, ndërsa po punohet për të përcaktuar se çfarë ka ndodhur në orët pas largimit të saj nga banesa.
