Ministri i Mbrojtjes së Qytetarit në Greqi, Mihalis Chrysochoidis, ka deklaruar se do të ketë ndalim të plotë të përdorimit të monopatinave elektrike për personat nën 18 vjeç.
Gjithashtu, për monopatinat me qira, do të vendoset që të jenë me sigurim të detyrueshëm.
“Nëse sot të godet një skuter, kush do të të dëmshpërblejë? Ku do të shkosh për drejtësi? Prandaj, sigurim i detyrueshëm edhe për ato me qira”, tha Chrysochoidis.
Lexo edhe:
Si masë e tretë ai përmendi hedhjen e monopatinave në trotuare, duke thënë se kjo duhet të marrë fund.
Sipas tij, bashkitë duhet të marrin masa për parkimin dhe, nëse është e nevojshme, të ulet edhe numri i lejeve, në mënyrë që të respektohen këmbësorët.
Çfarë parashikon kuadri i ri
Në qendër të ndryshimeve është ndalimi i plotë i qarkullimit të monopatinave elektrike për të miturit në rrugët publike. Masa po shqyrtohet për shkak të shqetësimeve të ekspertëve të sigurisë rrugore, pasi janë shtuar rastet me të rinj pa pajisje mbrojtëse dhe pa njohuri për rregullat e qarkullimit.
Qeveria greke vlerëson se përdorimi i tyre nga të miturit ka marrë përmasa të pakontrollueshme, veçanërisht në zonat urbane me densitet të lartë.
Gjithashtu, kuadri i ri parashikon sigurim të detyrueshëm të përgjegjësisë civile për përdoruesit e rritur të monopatinave elektrike, për të mbuluar dëmet dhe aksidentet gjatë qarkullimit, pasi janë shtuar rastet e lëndimeve të këmbësorëve dhe përplasjeve me automjete.
Ligji i ri është në fazën përfundimtare të përpunimit dhe pritet të hidhet në konsultim publik brenda dy javëve të ardhshme, ndërsa synimi është që të miratohet menjëherë pas kësaj.
Rregullorja pritet të përfshijë edhe gjoba më të larta administrative për shkelësit dhe kompanitë që ofrojnë monopatina jashtë standardeve teknike të përcaktuara.
Kontrollet pritet të ashpërsohen, me fokus të veçantë te mjetet që zhvillojnë shpejtësi mbi kufijtë e lejuar ose që janë modifikuar në mënyrë të paligjshme. Në shënjestër do të jenë gjithashtu kompanitë e importit dhe tregtimit që dyshohet se shesin modele pa certifikimet e nevojshme të sigurisë.
