Besart Kelmendi, reperi nga Peja i njohur si Gjesti është ndaluar nga Policia e Kosovës në Prishtinë nën dyshimin për armëmbajtje pa leje.
Sipas informacioneve te publikuara nga Prive, artisti po mbahet në ndalim policor për 48 orë, një procedurë standarde hetimore që i jep kohë Prokuroria e Shtetit e Kosovës të vlerësojë provat dhe rrethanat e rastit për të vendosur nëse çështja do të dërgohet në gjykatë.
Burime për “Demantim News” bëjnë të ditur se Gjesti dyshohet se ka shkuar i armatosur tek Erkand Shabani, pronari i kompanisë muzikore Onima. Sipas të njëjtave burime, kjo nuk është hera e parë që mes palëve ka pasur tensione, por këtë herë situata dyshohet të jetë përshkallëzuar pasi këngëtari e ka kërcënuar atë me armë zjarri.
Konflikti dyshohet se lidhet me një kontratë që Gjesti kishte firmosur me kompaninë “Onima” para se të hynte në spektaklin Big Brother VIP Albania. Pas daljes nga edicioni i tretë i këtij reality show, ai kishte kërkuar të shkëpuste kontratën, gjë që sipas burimeve ka krijuar përplasje mes palëve.
Sipas Kodit Penal të Republikës së Kosovës, për posedim apo mbajtje të paautorizuar të armëve parashikohen dy sanksione kryesore: gjobë që mund të arrijë deri në 7,500 euro ose dënim me burgim deri në pesë vjet.
Megjithatë, në shumë raste të armëmbajtjes së thjeshtë, kur arma nuk është përdorur për kryerjen e një krimi tjetër, gjykatat shpesh vendosin dënime më të buta, si gjoba ose dënime me kusht.
