Aeroporti Ndërkombëtar i Tiranës po përjeton një nga periudhat më të ngarkuara në historinë e tij, teksa rritja e numrit të turistëve dhe zgjerimi i linjave ajrore po sjellin shifra rekord.
Vetëm gjatë muajve qershor dhe korrik 2026, trafiku i pasagjerëve u rrit me 28% krahasuar me të njëjtën periudhë të një viti më parë.
Por rekordi më i madh u regjistrua më 17 gusht. Brenda vetëm 24 orëve, në Aeroportin e Tiranës kaluan 60,291 pasagjerë, duke e bërë atë ditën më të ngarkuar në historinë e aeroportit.
Lexo edhe:
Gjatë së njëjtës ditë u realizuan 326 lëvizje avionësh, ndërsa 32 kompani ajrore lidhën Tiranën me 79 destinacione të ndryshme. Italia, Mbretëria e Bashkuar, Polonia, Turqia dhe Belgjika rezultuan ndër tregjet kryesore.
Rritja e ndjeshme e trafikut ajror po shoqërohet edhe me investime të reja. Aeroportit i janë shtuar gjashtë porta të reja imbarkimi, ndërsa janë zgjeruar ambientet e check-in. Në funksion të përpunimit më të shpejtë të pasagjerëve po përdoren gjithashtu shërbimet Self-Bag Drop dhe Fast Track.
Një tjetër zhvillim i rëndësishëm i këtij viti ka qenë hapja e linjës direkte Tiranë–Toronto, fluturimi i parë i drejtpërdrejtë që lidh Shqipërinë me Kanadanë.
Interesi për këtë linjë rezulton tepër i lartë. Sipas të dhënave të publikuara, fluturimet Tiranë–Toronto kanë regjistruar një nivel mbushjeje prej mbi 97%, duke treguar kërkesën e madhe për lidhje direkte mes Shqipërisë dhe Amerikës së Veriut.
Rritja e aeroportit ecën paralelisht edhe me shtimin e trafikut ajror në vend. Të dhënat zyrtare të bëra publike gjatë gushtit tregojnë se vetëm nga janari deri në korrik 2026 në hapësirën ajrore shqiptare janë përpunuar rreth 242 mijë fluturime, rreth 11% më shumë se një vit më parë.
Ndërkohë, Aeroporti Ndërkombëtar i Tiranës është përzgjedhur këtë vit edhe si finalist për çmimin “Aeroporti i Vitit” nga International Airport Review, në një periudhë kur Shqipëria po zgjeron me ritme të shpejta lidhjet e saj ajrore me Europën dhe destinacionet transatlantike.
