Qeveria ka vendosur të shpallë si pasuri kulturore të paluajtshme Qendrën Historike të fshatit Dhërmi, duke përcaktuar njëkohësisht edhe zonën e saj mbrojtëse.
Vendimi është miratuar në mbledhjen e sotme të Qeverisë dhe është propozuar nga Ministria e Turizmit, Kulturës dhe Sportit, duke u bazuar në ligjin “Për trashëgiminë kulturore dhe muzetë”. Sipas autoriteteve, qëllimi është ruajtja e vlerave historike dhe arkitektonike të zonës.
Paralelisht, është miratuar edhe plani për ruajtjen, mbrojtjen dhe administrimin e qendrës historike dhe zonës përreth, i cili do të shërbejë si dokument bazë për menaxhimin e kësaj pasurie kulturore.
Vendimi parashikon që hartat e zonës të publikohen në Gjeoportalin Kombëtar, ndërsa Agjencia Shtetërore e Kadastrës do të kryejë regjistrimin përkatës.
Për zbatimin e këtij vendimi janë ngarkuar Ministria e Turizmit, Ministria e Infrastrukturës dhe Energjisë, si dhe Bashkia Himarë.
