Ky filmim tregon momentet kur pasagjerët e një avioni të kompanisë Flydubai, nisur nga Dubai drejt Tel Avivit, ndërhynë për të neutralizuar njërin nga pilotët, që sulmoi me thikë kolegun duke rrezikuar një tragjedi të vërtetë.
Ngjarja ndodhi në orët e para të kësaj të mërkurë teksa avioni fluturonte mbi Arabinë Saudite, ku edhe bëri ulje të detyrueshme rreth orës 07.00 në aeroportin e qytetit veriperëndimor të Tabukut.
Mediat izraelite hodhën dyshime se piloti sulmues është nga Omani. Përleshja mes tyre nxorri avionin nga kontrolli, që humbi 5200 metra lartësi brenda 2 minutash.
Gjatë kaosit, bordi transmetoi kodin e pengmarrjes, duke ngritur alarmin për një tentativë terroriste ose përpjekje për të rrëzuar mjetin ajror rreth orës 05:30.
Katastrofa u shmang falë reagimit të shpejtë të disa pasagjerëve izraelitë dhe dy pilotëve me rroba civile që udhëtonin në bord, për neutralizimin e autorit.
Pilotët dhe disa pasagjerë që ndërhynë mbetën të plagosur. Pas uljes së suksesshme, pasagjerët e avionit Boing 737 Max me rreth 150 pasagjerë në bord, shpërthyen në duartroktitje.
Dy pilotët e dëmtuar u dërguan në spital me plagë thike. Autoritetet po hetojnë zbardhjen e plotë të ngjarjes, ndërsa pista kryesore është ajo e terrorizmit.
