Kompozitori A. Hila i cili shfaqet në video intime me disa gra të famshme është kontaktuar mbrëmjen e kaluar nga policia, e cila e ka njoftuar se ka nisur një hetim kryesisht lidhur me publikimin e materialeve intime me disa artiste.
Gjatë komunikimit telefonik, Hila ka deklaruar se nuk ndodhet në Tiranë dhe se është i tronditur nga situata e krijuar. Ai ka bërë të ditur se do të paraqitet në polici sapo të kthehet në kryeqytet, për të dhënë deklarimet e tij dhe për të sqaruar versionin e vet lidhur me publikimin e materialeve. Marrja në pyetje pritet të bëhet gjatë ditës së sotme.
Ndërkohë, burime bëjnë me dije se policia ka kontaktuar edhe viktimat, të cilat janë në gjendje të rënduar në lidhje me situatën. Brenda ditës edhe ato pritet të paraqiten në polici për të dhënë deklarime për situatën. Edhe gazetari Elton Tozaj do të merret në pyetje, por në një moment të dytë, pas marrjes se dëshmive të Hilës dhe artisteve të përfshira.
