Ftesa e Bashkisë Korçë për këngëtarin Goran Bregoviç në Festën e Birrës, ka shkaktuar mjaft reagime në rrjetet sociale. Një pjesë e reagimeve janë emocionale, megjithatë mbizotërojnë qendrimet e argumentuara kundër duke kërkuar nga Shqipëria që të bëjë empati me shqiptarët e Kosovës, të cilët i kanë ende të freskëta plagët e luftës dhe masakrave nga ushtria e Millosheviçit, ndaj regjimit të të cilit Bregoviç nuk ka dalë asnjëherë kundër. Madje, ndërkohë që NATO sulmonte regjimin e Millosheviçit për masakrat në Kosovë, Bregoviç bënte koncerte kundër bombardimeve në sheshet e Athinës.
Por, pavarësisht kësaj Bashkia e Korçës nuk është tërhequr nga ftesa për Goran Bregoviç duke arsyetuar se nuk duhet përzierë arti me politikën dhe argumente të ngjashme.
Lexo edhe:
Madje, ajo ka guxuar edhe më tej. Ndërkohë që shqiptarët përplasen mes veti me argumente kundër dhe pro pranisë së tij, nisur nga e shkuara e këngëtarit, Bashkia e Korçës ka nxjerrë në shitje biletat për çdokënd që do të dojë të dëgjojë këngën “Kallashnikov” apo të ngjashmet e saj.
Përmes një njoftimi në faqen zyrtare të saj, Bashkia e Korçës ka nxjerrë edhe linkun ku mund të blihen biletat me vlerë 1 000 lekë!
Edhe sikur të mos ekzistonte ndjeshmëria ndaj pranisë së Bregoviçit në Korçë, Festa e Birrës është një organizim që bëhet me fonde publike, ç’ka e bën tepër të guximshëm këtë veprim të bashkisë. Nga njëra anë Bashkia e Korçës shpenzon taksat e qytetarëve për të bërë një organizim të tillë dhe nga ana tjetër iu kërkon atyre bileta për të dëgjuar një këngëtar, qoftë edhe si Goran Bregoviç.
