Ka një ndryshim të madh mes të udhëtuarit dhe ndjekjes së një itinerari viral. Sot, gjithnjë e më shumë njerëz mbërrijnë në një qytet me një listë të gatshme: kafeneja që duhet fotografuar, restoranti ku duhet provuar një pjatë specifike, rruga ku duhet bërë videoja dhe këndi që është bërë viral në TikTok. Në vend që të eksplorojnë, ata thjesht riprodhojnë përvojën e dikujt tjetër.
Kjo është edhe ideja që trajton autorja Sarah Kanaan në artikullin e saj “Stop Calling It Travel. You’re Following an Itinerary Written by TikTok.” Sipas saj, algoritmet e rrjeteve sociale kanë filluar të ndikojnë jo vetëm në destinacionet që zgjedhim, por edhe në mënyrën se si i përjetojmë ato. Udhëtimet po kthehen në një garë për të rikrijuar të njëjtat foto dhe video që kemi parë online, duke lënë gjithnjë e më pak hapësirë për spontanitetin.
Artikulli hapet me një nga thëniet më të njohura të Anthony Bourdain, i cili besonte se udhëtimi është një mënyrë për të parë botën me sytë e të tjerëve. Ai shkruante se duhet të lëvizim sa më larg dhe sa më shpesh të mundemi, qoftë përtej oqeanit apo vetëm matanë lumit, sepse vetëm kështu mund të kuptojmë më mirë njerëzit dhe kulturat e tyre.
Lexo edhe:
Në kontrast me këtë filozofi, sot shumë udhëtarë mbërrijnë në destinacion me gjithçka të planifikuar nga algoritmi. Vizitojnë të njëjtat vende, porosisin të njëjtat pjata dhe bëjnë të njëjtat poza si mijëra njerëz para tyre. Përvoja bëhet e parashikueshme dhe qytetet, sado të ndryshme të jenë, fillojnë të duken njësoj.
Sigurisht, rrjetet sociale mbeten një burim i shkëlqyer frymëzimi. Ato na ndihmojnë të zbulojmë vende të reja dhe të planifikojmë më mirë udhëtimet. Por ndonjëherë, momentet më të bukura nuk janë ato që shfaqen në ekran. Janë rrugicat ku humb rastësisht, restoranti që ta sugjeron një banor vendas, biseda me njerëz që nuk i kishe planifikuar kurrë t’i takoje.
Në fund, pyetja mbetet e njëjtë: po udhëtojmë për të zbuluar botën, apo thjesht për të rikrijuar atë që kemi parë në TikTok? Ndoshta udhëtimi më i mirë është ai që të lë hapësirë të surprizohesh. Sepse përvojat më të vlefshme nuk janë gjithmonë ato që bëhen virale.
