Një problem teknik në sistemin e monitorimit të trafikut ajror të Albcontrol ka sjellë pezullimin për disa minuta të fluturimeve në hapësirën ajrore shqiptare.
TIA sqaron se ndërprerja e përkohshme e fluturimeve është kryer si masë sigurie, për shkak të problematikës së shfaqur në sistemin e Albcontrol.
Sipas njoftimit të TIA-s, problemi është adresuar menjëherë dhe po bëhen të gjitha përpjekjet për rikthimin sa më të shpejtë të operacioneve në normalitet.
Lexo edhe:
Aeroporti Ndërkombëtar i Tiranës ndodhet në kontakt të vazhdueshëm me autoritetet përkatëse dhe kompanitë ajrore, ndërsa ka angazhuar numrin maksimal të stafit për menaxhimin e situatës dhe të pasagjerëve të prekur.
Problemi teknik në Albcontrol ka sjellë edhe pasoja konkrete në oraret e fluturimeve. Deri në këto momente, 5 fluturime janë anuluar, 1 është riplanifikuar për ditën e nesërme, 12 fluturime kanë regjistruar vonesa në nisje, ndërsa 3 të tjera kanë mbërritur me vonesë.
Pasagjerët këshillohen të kontrollojnë vazhdimisht njoftimet e kompanive të tyre ajrore për informacionin më të fundit mbi statusin e fluturimeve.
“Siguria e pasagjerëve mbetet prioriteti kryesor”, thekson Aeroporti Ndërkombëtar i Tiranës.
