Një 42-vjeçar, i identifikuar si Keli Hoxha, humbi jetën të martën në kalanë e Beratit pasi u qëllua me thikë nga Kristo Mema 63 vjeç. Shkak i kësaj vrasje u bë një dëshirë e vajzës së mitur e 42-vjeçarit për të bërë një foto me kalin e 63-vjeçarit. Ky i fundit ka kërkuar që të largohen nga kali dhe ka nisur një konflikt verbal dhe më pas e qëlloi me thikë 42-vjeçarin, i cili humbi jetën.
Në emisionin “Opinion”, gjatë diskutimit për ngjarjen, në celularin e Blendi Fevziut mbërriti një mesazh. Në media, por edhe gjatë emisionit, thuhet se autori 63-vjeçar ishte një person problematik dhe mesazhi sjell një rast konkret të ndodhur gjatë vitit të shkuar.
Lexo edhe:
“E di çfarë më shkruan dikush? Personi, e dinte gjithë Berati që ishte problematik. Vjet vajza shkoi në ekskursion me klasën dhe një prej shokëve të vet, thjesht se po shihte kalin, vrasësi e ka ndjekur me gurë duke i thënë pse më sheh kalin, desh i hapi kokën. Mos të kishte ndërhyrë mësuesja… sapo e pa në lajme vajza, tha mami ky është ai xhaxhi që na gjuajti shokun me gurë”, shkruante mesazhi.
