Fondacioni Domi i ka dhënë një pamje krejtësisht të re palestrës së Shtëpisë së Fëmijës “Zyber Hallulli” në Tiranë, duke e transformuar atë në një hapësirë moderne sportive dhe argëtuese për 37 fëmijët e qendrës. Përmes rikonstruksionit dhe pajisjes me mjete bashkëkohore, fondacioni ka krijuar një mjedis të sigurt dhe funksional për sport, lojë dhe socializim.
Presidenti i Fondacionit Domi, z. Dervish Domi, njëherazi President i Atlas Corporation, u shpreh se ky kontribut ka një domethënie të veçantë personale për të. “Jemi shumë të lumtur që kemi mundësi të ndihmojmë vogëlushët e Shtëpisë së Fëmijës ‘Zyber Hallulli’. Unë jam rritur vetë jetim, pa babain. Nëna na rriti e vetme, me shumë vështirësi, gjashtë fëmijë. Ndaj gëzohem shumë që sot mund të ndihmoj sadopak.
Nuk do t’i lëmë vetëm këta fëmijë,” tha z. Domi. Drejtoresha e Shtëpisë së Fëmijës “Zyber Hallulli”, znj. Valbona Imeraj, falënderoi Fondacionin Domi për mbështetjen e dhënë. “Falënderojmë përzemërsisht Fondacionin Domi dhe Presidentin Dervish Domi për këtë mbështetje të vyer. Falë këtij investimi, fëmijët tanë do të kenë në dispozicion një mjedis modern dhe të përshtatshëm për aktivitete sportive, argëtuese dhe zhvillimore,” theksoi znj. Imeraj. Zv. Presidenti i Atlas Corporation, z. Aurel Domi, u shpreh se ky është një ndër aktivitetet sociale të Fondacionit Domi dhe se nisma të tilla do të vijojnë edhe në të ardhmen. “Ky është një ndër aktivitetet sociale të Fondacionit Domi dhe këto punë të mira do të vijojnë.
Lexo edhe:
Ne kemi kënaqësi t’i mirëpresim një ditë fëmijët e Shtëpisë së Fëmijës ‘Zyber Hallulli’ në fabrikën e Atlas dhe Ola në Kashar. Duam që ata të vijnë, të argëtohen dhe të mësojnë,” tha z. Aurel Domi. Fondacioni Domi është pjesë e Korporatës Atlas, e cila përbëhet nga disa kompani, ndër të cilat Atlas Mills, Ola Foods, Besniku sh.p.k., Atlas Energy, Edil Centro etj. Kompanitë e këtij grupi kontribuojnë së bashku në kuadër të përgjegjësisë sociale, me qëllim mbështetjen e shtresave vulnerabël dhe komuniteteve në nevojë në shoqërinë shqiptare.
Kontributi që më parë bëhej në mënyrë direkte nga kompanitë tashmë kanalizohet përmes Fondacionit Domi. Përmes këtij investimi, Fondacioni Domi synon të krijojë më shumë mundësi për zhvillimin fizik, social dhe emocional të fëmijëve, duke u ofruar atyre një hapësirë më të mirë për lojë, sport dhe ndërveprim.
