Ministrja e Arsimit, Sportit dhe Rinisë, Evis Kushi ka zgjedhur të urojë Ditën e Mësuesit nëpërmjet një videoje ku ajo vetë i është bashkuar me nxënës të shkollave të ndryshme të vendit.
Nëpërmjet këtij video-mesazhi ministrja Kushi nënvizon se ky është një 7 Mars ndryshe nga herët e tjera për shkak të pandemisë.
“Sot është 7 marsi, Festa e Mësuesit. Një 7 mars ndryshe nga çdo herë tjetër. Një 7 mars kur çdo nxënës e prind po ndjen sakrificën madhore të mësuesve tanë që do të mbahet mend shumë gjatë”, thotë Kushi.
Duke uruar gjithashtu që “çdo 7 mars në të ardhmen të mos i ngjajë këtij të sot, por të vijë i mbarë, dhe ne të mund të dhurojmë lule e përqafime me njëri-tjetrin”, ministrja falënderon mësuesit për profesionalizmin dhe përkushtimin maksimal.
“Të dashur mësues! Falënderimet dhe mirënjohja për ju, asnjëherë nuk mjaftojnë! Sepse çdo mësues është një hero! Një hero që të merr për dore, të ndriçon e bëhet udhërrëfyesi yt”, mbyll mesazhin e saj ministrja.
