Fundi i këtij muaji pritet të ketë një vendim për shpërndarjen e bonusit vjetor për pensionistët e të gjitha llojeve.
Përpos shumës, e cila është thënë vazhdimisht që do të jetë më e lartë se ajo e viteve të shkuara (5 mijë lekë), në tryezën e diskutimeve të Ministrisë së Ekonomisë dhe Institutit të Sigurimeve Shoqërore është sjellë propozimi për diferencimin e përfitimeve midis pensionstëve.
Fjala është që të jepen më shumë para tek ata që kanë pensione më të ulëta dhe anasjellas.
Lexo edhe:
Kjo ndarje synon të mbështesë pensionistët që trajtohen me pensione të ulëta, të cilët janë kryesisht pensione rurale apo pensione të pjesshme, për shkak se nuk kanë shumë vite pune.
Vetë reforma, e cila po punohet me asistencën e ekspertëve të Bankës Botërore këtë synon të nxisë në vetvete, të rrisë përfitimet e atyre që marrin më pak dhe të zbusë diferencat midis pensioneve urbane me ato rurale.
Referuar statistikave zyrtare të ISSH-së, në fund të vitit 2023 në skemën e pensioneve rezultonin rreth 705 mijë qytetarë, përkatësisht 608,581 pensione urbane dhe 96,418 pensione rurale.
Ndër pensionet urbane, 503,747 janë për pleqëri, 60,956 për invaliditet dhe 43,878 janë pensione familjare. Të dhënat më të fundit për vitin 2024 tregojnë se numri ka arritur në 720 mijë.
Me indeksimin e fundit të bërë në muajin tetor, pensioni social arrin në 9710 lekë në muaj, ndërsa pensionet plota të pleqërisë dhe invaliditeti nuk do të jenë më pak se 17.900 lekë. Në të njëjtën masë do të nisin dhe pensionet e parakohshme. Përfitues të indeksimit do të jenë edhe ata pensionistë që dalin në pensin gjatë muajit tetor 2024.
Pensionet që përfitojnë bonus:
- Pensionet e pleqërisë;
- Pensionet e kooperativave;
- Pensionet sociale;
- Pensionet e invalidëve të luftës;
- Pensionet e caktuara me dekret;
- Pensionet e caktuara nga sigurimet shoqërore;
- Pensione suplementare;
- Pensionet e familjeve të pilotëve që humbin jetën;
- Pensionet e oficerëve;
- Pensionet e minatorëve;
- Pensionet e atyre që kanë punuar nën tokë;
- Pensionet e ushtarakëve;
- Pensionet e akademikëve;
- Pensionet e personave që kryejnë funksione kushtetuese;
- Pensionet e invalidëve;
- Pensione të veçanta;
- Pensionet për fëmijët në përkujdesje të shtetit.
