Detaje të reja të forta kanë dalë lidhur me vrasjen e bujshme të të riut Klodian Rasha mëngjesin e 8 dhjetorit në Laprakë.
Referuar pamjeve filmike të siguruara nga prokuroria në vendin e ngjarjes, është bërë e mundur zbardhja e pjesës më dinamike të kësaj ngjarjeje, e cila çoi në ekzekutimin e të riut prej efektivit të Shqiponjave, Nevaldo Hajdaraj. Mësohet se prokuroria ka zbuluar nga kamerat e sigurisë se mes Nevaldo Hajadarajt dhe Klodian Rashës fillimisht ka pasur një përplasje fizike, ndërsa më pas efektivi i Shqiponjave ka nxjerrë armën duke qëlluar ndaj 25-vjeçarit.
Gjithashtu referuar pamjeve filmike të siguruara nga prokuroria mësohet se gjatë përplasjes fizike, Hajdaraj ka pasur mundësinë të shohë se Rasha nuk ka pasur armë me vete, megjithatë ka nxjerrë pistoletën e tij të shërbimit duke qëlluar ndaj tij. Është pikërisht ky fakt, si edhe gjetja e një tjetër pistolete 200 metra larg vendit të krimit që ka bërë që prokuroria të arrijë në konkluzionin se Klodian Rasha u vra me dashje nga polici Nevaldo Hajdaraj. Kujtojmë se, edhe vetë kolegu i Hajdarajt Erjon Gjore, deklaroi më parë se para vrasjes, mes Rashës dhe Hajdarajt pati një përplasje fizike. Sipas tij, Nevaldo Hajdaraj dhe Klodian Rasha janë përplasur fizikisht për disa sekonda kur ai ka qenë 100 metra larg tyre. Pikërisht kjo dëshmi është konfirmuar edhe nga vetë prokuroria.
“Personi kaloi karrexhatën në rrugën “Dritan Hoxha” dhe doli në trotuar përballë “Zoja e Këshillit të Mirë”..duke vrapuar në drejtim të Zogut të Zi… në këtë moment pashë kolegun Nevaldo i cili po vinte në drejtim të këtij personi (Klodianit) dhe përpara dyqanit “pit stop” në pikën fillestare të lëvizjes është përplasur me atë fizikisht për pak sekonda. Unë isha rreth 100 metra larg. Pas pak sekondash përplasje pashë kolegun Nevaldo të shtrirë përtokë… dhe në këtë moment dëgjova dy të shtëna armësh.
U afrova dhe ngrita kolegun Nevaldo dhe së bashku jemi afruar te viktima i cili po rënkonte. Njoftuam sallën operative dhe kërkuam ambulancë”, ka deklaruar ai. Theksojmë sërish se nisur nga kjo provë e re, pritet që efektivi i policisë të përgjigjet për akuzën e vrasjes me dashje, pasi fakti që ai i ka kapur duart, ai e ka pasur të qartë që po qëllonte një person të paarmatosur.
Kujtojmë se arrestimi i efektivit Nevaldo Hajdaraj u bë në datë 11 dhjetor të vitit të kaluar teksa gjatë seancës gjyqësore, teksa ka marrë fjalën efektivi është shprehur se është penduar për veprimin e kryer, ndërsa ka kërkuar që familja e viktimës të ishte në seancë në mënyrë që t’i kërkonte falje. “Sillni familjen këtu, dua t’i kërkoj falje. Kam marrë një jetë njeriu, merrni çfarëdo lloj mase ndaj meje. Jam penduar”, mësohet të jetë shprehur polici 31-vjeçar.
Ngjarja
Vrasja e të riut Klodian Rasha në kryeqytet, muajin dhjetor të vitit të kaluar u kthye në kryefjalën e vendit dhe gjithë opinionit publik. Ngjarja ka ndodhur konkretisht mëngjesin e 8 dhjetorit rreth orës 1:45 në rrugën “Dritan Hoxha” në Tiranë, në lagjen e të riut, pak metra larg shtëpisë së tij. I riu kishte dalë nga shtëpia për të blerë një paketë cigare në rrugicën pranë banesës së tij, sipas familjarëve. Por, në rrethana që ende nuk dihen plotësisht, ai u përball me patrullën e repartit Shqiponja, Nevaldo Hajdaraj dhe Erjon Gjergo. Pas 5 minutash ndjekje nga efektivët e policisë, Rasha u qëllua me armë nga Nevaldo Hajdaraj. Pas kësaj ngjarje një valë protestash ka shpërthyer në Tiranë dhe disa qytete të Shqipërisë.
