Balerini i njohur shqiptar Kledi Kadiu i cili prej vitesh jeton në Itali ka rrëfyer një dramë me të cilën po përballen ai dhe bashkëshortja e tij Charlotte. Djali i tyre i vogël Gabrieli i cili erdhi në jetë në gusht të vitit të kaluar ka shfaqur probleme të rënda shëndetësore.
Kadiu ka ndarë një foto të të voglit të tyre duke vendosur të tregojë një pjesë të historisë pasi kjo mund të jetë një mënyrë për të qenë më afër nënave dhe baballarëve që po përballen me një histori të ngashme me të tyren.
“13 ditë pas lindjes Gabrieli shfaqi ethe dhe kriza të rënda, shenja të një diagnoze mjaft komplekse: meningo-encefalt”, tregon balerini.
Lexo edhe:
Ai shton se Gabrieli ia doli të hapë sërish sytë me guximin e një heroi dhe nxori në pah të gjithë forcën dhe energjinë që kishte para se kjo sëmundje ta prekte.
“Pas më shumë se një muaj e gjysmë kujdes intensiv, ne u kthyem në shtëpi, duke e ditur se rrugëtimi drejt rikuperimit do të kishte qenë i gjatë dhe sfidues. (…) Ne nuk duam të fshihemi pas fjalëve duke pretenduar se gjithçka është e thjeshtë, por besojmë në vullnetin e pafund të luftëtarit tonë të vogël, në qëndrueshmërinë dhe në dashurinë si stimuli më i mirë për të mësuar.
Dhe pikërisht për këtë vendosëm të ndajmë historinë tonë. Kur ndodhin gjëra të tilla, ju prekni fundin dhe mund të jetë e vështirë të gjesh forcën për t’u kthyer në sipërfaqe. Ndryshimi mund të bëhet nga njerëzit që ata zgjedhin të kenë në krah dhe profesionistët të cilëve u besojnë për të rritur fëmijën e tyre. Nuk është e lehtë të përkthejmë ndjenjat tona në pak rreshta, sigurisht që ndihemi jashtëzakonisht mirënjohës që kemi pranë Gabrielin i cili na mëson çdo ditë se sa e çmuar është dhurata e jetës”, shkruan ai.
