Shtëpia e këngëtares së njohur kosovare, Adelina Berisha, ka rënë pre e një grabitje në orët e para pas mesnate.
Është bërë me dije që ngjarja të ketë ndodhur rreth orës 01:30, në rrugën “Shaip Kamberi” të kryeqytetit të Kosovës, Prishtinë.
Sipas policisë, hajdutët kanë arritur të hyjnë në shtëpinë e këngëtares dhe aty kanë arritur të marrin një shumë të madhe parash të thata dhe disa stoli ari. Ka qenë vetë Berisha, e cila ka bërë denoncimin për grabitjen në Polici, ku ka dhënë edhe deklaratën e saj.
Mësohet gjithashtu se këngëtares i janë vjedhur rreth 10 mijë euro, si dhe stoli të arit, vlera e të cilave nuk dihet. Pas deklaratës së dhënë para hetuesve, prokurori i çështjes ka dhënë urdhër që ky rast të regjistrohet si “vjedhje e rëndë” dhe të nisin hetimet për kapjen e të dyshuarve.
Kjo nuk është hera e parë që këngëtarja Adelina Berisha bie pre e sulmeve të tilla, pasi në vitin 2016, asaj i dogjën makinën, ku një person kishte thyer xhamin me gurë dhe i kishte hedhur benzinë, duke i vënë flakën.
Adelina Berisha ka reaguar pas vjedhjes 10 mijë eurove dhe stolive prej ari në shtëpinë e saj ditën e sotme.
Ajo ka konfirmuar aktin, duke thënë se ishte planifikuar për një kohë të gjatë, pasi askush nga familjarët e saj nuk kanë qenë në shtëpi kur ka ndodhur vjedhja.
Lidhur me gjendjen e saj shëndetësore apo psikologjike pas situatës së ndodhur, këngëtarja u shpreh se është mirë.
“Mirë por nuk kemi qenë askush në shtëpi, kemi qenë në një aheng familjar”, tha Adelina.
