E rikthyer në shkëlqimin e saj pas restaurimit të plotë, Xhamia e Plumbit është sot një ndër monumentet më të vizituara dhe më të dashura të Shkodrës. Ky simbol i trashëgimisë kulturore shqiptare po tërheq çdo ditë dhjetëra vizitorë vendas e të huaj, të cilët mahniten nga historia dhe arkitektura e saj unike.
E ndodhur pranë Kalasë së Rozafës, xhamia ka një pozicion të veçantë që e bën pjesë të pandashme të çdo guide turistike në qytet. Vizitorët që ngjiten për të parë kalanë ndalojnë gjithmonë edhe në këtë monument historik për të njohur më nga afër të kaluarën e Shkodrës.
Sipas Drejtorisë Rajonale të Trashëgimisë Kulturore në Shkodër, përfshirja e xhamisë në guidat turistike kombëtare dhe ndërkombëtare ka ndikuar ndjeshëm në rritjen e numrit të vizitorëve. “Pas restaurimit, interesi ishte i pritshëm. Xhamia e Plumbit është tashmë një ndër pikat më të njohura të qytetit, si për historinë, ashtu edhe për arkitekturën e saj unike,” thekson institucioni.
Pas tre vitesh punime të thelluara restauruese, Xhamia e Plumbit iu rikthye besimtarëve dhe vizitorëve më 8 maj 2025, duke u rindërtuar pothuajse nga themelet pas dëmtimeve të shumta ndër vite.
Sot, xhamia është shumë më tepër se një objekt kulti – është një monument i gjallë i besimit, historisë dhe kulturës shqiptare. Falë vlerave të saj arkitektonike dhe estetike, ajo është renditur ndër 50 xhamitë më të bukura në botë, duke e vendosur Shkodrën në hartën e destinacioneve më tërheqëse të turizmit kulturor dhe fetar.
