Shkrimtari i njohur Ben Blushi ka pritur sot kopjet e para të romanit të tij të ri, që tashmë ndodhet në shtypshkronjë. Titulli mbetet sekret sipas kërkesës së botuesit, i cili ka zgjedhur heshtjen si strategji marketingu.
Me humor karakteristik, Blushi shkruan: “Unë jam pak më i nxituar, por botuesve u kam frikë. Ata ndoshta nuk dinë të shesin një libër të keq, por dinë të shkatërrojnë librin më të mirë.”
Libri botohet nga Onufri, është shkruar brenda 75 ditësh, ka 221 faqe dhe kopertina është realizuar nga djali i autorit.
Ajo që bie më shumë në sy është deklarata e tij se romani ka kaluar sfida të mëdha: Ben Blushi thekson se disa persona, madje edhe disa botues nuk kanë dashur që romani të botohet fare. Sipas tij, ka pasur përpjekje serioze për ta penguar botimin e librit që në fazat e para.
Një mik i autorit i ka thënë se “romani ka pasur historinë e vet edhe pa u botuar”, duke nënkuptuar vështirësitë dhe intrigat rreth tij.
Romani do të prezantohet të hënën me miq në hotel Plaza, ndërsa më pas do të jetë në librari dhe në stendën e Onufrit në Panairin e Librit që nis të mërkurën.
“Ju pres të gjithëve te stenda e bukur e Onufrit. Atëherë edhe do ta tregoj titullin,” shkruan Ben Blushi.
