Mikela Pupa ishte e ftuar së fundmi në Andale Media, ku ndër të tjera foli edhe për prishjen e miqësisë me Efi Dhedhesin. E pyetur nga moderatorët nëse ishte penduar që u fut së bashku me Efin në “BBVA” 2, Mikela u përgjigj:
“Nuk pendohem. Jam njeri që nuk rri e vras shumë mendjen ‘Si ndodhi?’, ‘Pse ndodhi?’. Dhe më pëlqen që ndodhi ashtu sepse më vonë koha tregoi dhe shumë gjëra të tjera.”
Pasi tregoi se nuk kanë më asnjë lloj kontakti me njëra-tjetrën, Mikela tregoi dhe variantin e saj për atë që ndodhi midis ish-mikeshave të ngushta:
“Nuk na ndau Big Brother-i. Nuk mund të të ndajë dikush nëse është një marrëdhënie e sinqertë, e fortë. Nuk dua të ndaloj shumë te kjo pjesa, gjëja e vetme që mua më vjen keq është që kujtimi i fundit që kam me të nuk ka qenë fare i mirë dhe kam qenë shtatzënë. Dhe është e vërtetë ajo që thonë gjithë gratë shtatzënë që ‘si të sillen njerëzit në atë periudhë, ti s’do ta harrosh kurrë. Kjo është e vetmja gjë që më ka ngelur pak… por që i uroj më të mirat dhe të ketë suksese në jetën e vet.”
Ndonëse Mikela i uroi më të mirat Efit, qartësisht ajo dukej ende e zhgënjyer për çfarëdo që ka ndodhur mes të dyjave.
Në fund, ajo nënkuptoi se mund të jetë përballur me një tjetër version të Efit, pas fitimit të një lloj popullariteti:
“Shiko, është një shprehje e vjetër që thotë ‘Kur të kesh lekun dhe famën i kupton vërtet njerëzit se kush janë’.”
Pas deklaratës së Mikelës, Efi postoi disa video në story-t e saj në Instagram, ku nisi të thoshte:
“E nisim ditën me një këshillë pozitive: sa herë të shihni dikë, dëgjoni dikë që mund t’ju ulë vlerat ose energjinë ose t’ju prishë ditën, ju aty merrni akoma më shumë fuqi dhe jepini, se sa më shumë njerëz të flasin keq për ju, do të thotë që jeni në rrugën e duhur.”
Më tej, Efi vazhdoi:
“Nëse jeni i mirë me të gjithë do të thotë që diçka nuk shkon me ju sepse njeriu nuk mund të përshtatet dhe të pëlqehet nga gjithkush, pra i bie që po shtireni, kështu që mos gënjeni veten. Mos u mundoni t’i përshtateni çdo shoqërie, por gjeni shoqërinë që ju përshtatet.”
Efi vazhdoi të shtjellonte mendimin se “do të ketë njerëz të cilët do të të pengojnë në rrugën tënde”, por gjithçka varet nga këndvështrimi yt për këta persona:
“Nëse ti e sheh që këta njerëz të cilët të pengojnë do të të shërbejnë, atëherë nuk do mërzitesh.”
Ajo thotë më pas se njerëz të ndryshëm kanë mendime të ndryshme për ne, më së shumti negative, dhe dha shembull nga vetja:
“Në rastin tim, ka raste që fytyra ime është… o Zot i madh dhe nuk më flitet me gojë. Personi që më ka takuar atë ditë, do thotë ‘ajo Efi shumë njeri i hidhur’. Ti ekziston në këtë botë në 1 milion versione të ndryshme.”
Dhe në fund, Efi përmbylli:
“E di cila është një nga fazat më të bukura të jetës? Atëherë kur ti ndalon së qeni një viktimë. Kur ndalon së fajësuari të tjerët për problemet që ti ke në jetë.”
