Alkida Llakaj, vajza e aktorit të njohur të humorit Agron Llakaj, ka ndarë për herë të parë publikisht dhimbjen që familja e saj ka përjetuar pas ndarjes nga jeta të nënës së saj, Konstandina Llakaj.
E ftuar në një intervistë televizive me Grida Dumën, Alkida rrëfeu sfidat emocionale që kanë shoqëruar familjen që nga momenti i diagnozës së sëmundjes së rëndë e deri më sot.
“Sa vite ka im atë në skenë, unë i kam në jetë. Pothuajse 40 viet dhe kjo është dalja ime e parë televizive. Isha shumë e dyzuar sepse emocionalisht nuk isha e fortë për të folur për babin, sepse e kam gjithmonë të lidhur me mamin. Edhe në telefonin tim, ata janë të pandashëm. Ashtu dua t’i mbaj gjithmonë pranë zemrës sime,” tha ajo.
Lexo edhe:
Alkida tregoi se familja ka hyrë në një periudhë të vështirë që nga korriku i tre viteve më parë, kur nëna e saj u diagnostikua me një sëmundie fatale.
“Janë tre vite që për ne kanë qenë një sfidë. Kemi qenë brenda një humnere, kemi humbur boshtin e familjes,” u shpreh ajo me emocione të forta.
Një nga momentet më të ndjera të intervistës ishte përshkrimi i përkushtimit të babait të saj, Agron Llakaj, ndaj bashkëshortes edhe pas ndarjes së saj nga jeta.
“Postimet e babit nuk janë të hiperbolizuara. Ai e viziton çdo ditë vendin ku prehet mami. Kur është jashtë Tiranës më thotë ‘Alkida, shko tek mami’. Sigurisht që shkoj edhe pa ma thënë. Kam njohur një dimension të jashtëzakonshëm, human, të tij,” tha ajo.
