Në kulmin e sezonit turistik, në disa qytete bregdetare të Shqipërisë janë shtuar shqetësimet e banorëve për turistët që lëvizin në rrugë, sheshe, dyqane apo lokale të veshur vetëm me rroba banjo. Nuk bëhet fjalë për nudizëm, por për një fenomen që shumë banorë e konsiderojnë të papërshtatshëm për hapësirat publike jashtë plazhit. Për disa është thjesht rehati gjatë ditëve të nxehta të verës, ndërsa për të tjerë është një çështje respekti ndaj kulturës dhe etikës së qytetit. Debati nuk është i ri dhe nuk kufizohet vetëm në Shqipëri, pasi shumë destinacione turistike në Europë kanë vendosur rregulla të qarta për mënyrën e veshjes jashtë zonave të plazhit.
Si veprojnë shtetet e tjera?
Itali – Qytete si Sorrento kanë ndaluar ecjen në rrugët e qytetit vetëm me bikini ose pantallona banjo, me gjoba që mund të arrijnë deri në 500 euro. Edhe destinacione të tjera, si Varenna pranë Liqenit Como, kanë vendosur gjoba për turistët që qarkullojnë gjysmë të zhveshur në qendër të qytetit. Autoritetet argumentojnë se synimi është ruajtja e dinjitetit të hapësirave publike dhe respektimi i banorëve.
Lexo edhe:
Spanjë – Në qytete si Barcelona, Málaga, Alicante dhe në disa zona të Mallorca-s, ecja në qytet me rroba banjo ose pa bluzë jashtë plazhit mund të ndëshkohet me gjoba që variojnë nga rreth 120 deri në 750 euro, në varësi të bashkisë. Shumë lokale dhe dyqane gjithashtu refuzojnë hyrjen e klientëve të veshur vetëm me rroba plazhi.
Kroaci – Destinacione shumë të frekuentuara si Split, Dubrovnik dhe Hvar kanë miratuar rregulla që ndalojnë ecjen në qytet me rroba banjo ose pa bluzë. Gjobat mund të arrijnë deri në 150 euro.
Portugali – Në qytetin turistik Albufeira, autoritetet kanë vendosur masa të ashpra ndaj turistëve që qarkullojnë me bikini apo pantallona banjo jashtë plazheve, pishinave dhe hoteleve. Gjobat parashikohen nga 300 deri në 1.500 euro
Francë – Në qytete si Nice, ecja topless në rrugët e qytetit mund të sjellë gjobë, ndërsa autoritetet theksojnë se rrobat e banjës duhet të kufizohen në plazhe dhe zonat përkatëse.
Në shumicën e rasteve, këto masa nuk synojnë të kufizojnë turistët, por të krijojnë një ekuilibër mes mikpritjes dhe respektimit të normave lokale. Mesazhi është i qartë: rrobat e banjës janë të mirëpritura në plazh, por jo domosdoshmërisht në rrugët, restorantet apo qendrat historike të qyteteve.
