Kur temperaturat rriten ndjeshëm, zgjedhja e veshjeve mund të bëjë një ndryshim të madh për mënyrën se si trupi përballon vapën.
Ekspertët thonë se veshjet e duhura mund të ndihmojnë edhe në uljen e përdorimit të kondicionerit, duke kursyer energji dhe duke reduktuar emetimet, bën të ditur BBC. Por cilat janë rrobat më të përshtatshme për ditët e nxehta?
Ngjyra ka rëndësi, por prerja është më e rëndësishme
Lexo edhe:
Shumë njerëz zgjedhin rroba të bardha gjatë verës, pasi kjo ngjyrë reflekton rrezet e diellit dhe nuk thith aq nxehtësi sa ngjyrat e errëta.
Megjithatë, studimet tregojnë se nuk është vetëm ngjyra që ndikon. Më e rëndësishme është mënyra si rrobat qëndrojnë në trup. Veshjet e gjera lejojnë qarkullimin e ajrit dhe ndihmojnë trupin të ftohet.
Një studim mbi veshjet tradicionale të beduinëve në shkretëtirë zbuloi se ata nuk nxehen domosdoshmërisht më shumë kur veshin të zeza, sepse rrobat e gjera krijojnë një hapësirë mes materialit dhe lëkurës, duke ndihmuar në qarkullimin e ajrit si një “oxhak” natyral.
Pra, në ditët e nxehta, veshjet e lirshme janë më të rëndësishme se ngjyra. Nëse zgjidhni veshje të ngushta, ekspertët sugjerojnë ngjyra më të çelëta.
Materiali i rrobave bën diferencën
Zgjedhja e materialit është një nga faktorët kryesorë për të qëndruar të freskët.
Pambuku, linoja, mëndafshi dhe disa materiale sintetike që lejojnë ajrosjen ndihmojnë që nxehtësia dhe lagështia të largohen nga trupi.
Linoja është shumë e përdorur gjatë verës sepse ka fibra të mëdha që lejojnë qarkullimin e ajrit, ndërsa mëndafshi është i lehtë dhe i rehatshëm. Pambuku thith djersën, por thahet ngadalë, ndaj mund të bëhet i pakëndshëm në vapë të madhe.
Materialet si najloni dhe poliesteri përdoren shpesh në veshjet sportive sepse largojnë lagështinë dhe thahen shpejt, megjithëse mund të mbajnë erë më lehtë.
“Është më mirë të përdoret një material që lejon avullin e ujit të kalojë, në mënyrë që të mos pengojë avullimin e djersës”, pohoi profesor Rhett Allain, ekspert i fizikës.
A ndihmojnë rrobat e lagura?
Një nga mënyrat më të thjeshta për t’u freskuar është përdorimi i rrobave të lagura. Kur uji avullon, ai merr nxehtësi nga trupi dhe ndihmon në uljen e temperaturës së lëkurës.
Megjithatë, mbrojtja nga dielli mbetet e rëndësishme, pasi ekspozimi i drejtpërdrejtë ndaj rrezeve UV mund të dëmtojë lëkurën.
Shkenca po kërkon rrobat e së ardhmes
Kompanitë sportive dhe studiuesit po zhvillojnë materiale të reja që reagojnë ndaj temperaturës së trupit dhe ambientit.
Disa fibra të reja janë krijuar për të lejuar largimin më të madh të nxehtësisë, ndërsa materiale të tjera ndryshojnë strukturë kur temperatura rritet, duke përmirësuar ajrosjen.
Megjithatë, deri sa këto teknologji të bëhen më të zakonshme, rregulli më i thjeshtë për ditët e nxehta mbetet: zgjidhni rroba të lehta, të lirshme dhe që lejojnë trupin të marrë frymë.
Pra, një bluzë e bardhë nuk është gjithmonë zgjidhja perfekte, kombinimi i materialit, prerjes dhe ajrosjes është çelësi për të qëndruar më të freskët gjatë vapës.
