Aeroporti Ndërkombëtar i Tiranës ka vendosur një rekord të ri në trafikun ajror, duke regjistruar 322 mbërritje dhe nisje avionësh brenda 24 orëve, sipas të dhënave zyrtare të publikuara nga Albcontrol.
Rekordi u arrit më 6 korrik 2026, duke lënë pas rekordin e mëparshëm prej 318 fluturimesh, i shënuar më 22 qershor 2026. Brenda vetëm pak javësh, numri i operimeve është rritur edhe më tej, duke konfirmuar ritmin e lartë të lëvizjeve në aeroportin kryesor të vendit.
Të dhënat e Autoritetit të Aviacionit Civil tregojnë se gjatë muajit qershor trafiku ajror në Aeroportin e Tiranës u rrit me 34%, një ritëm shumë më i lartë se mesatarja evropiane, e cila ishte vetëm 2%.
Lexo edhe:
Sipas analizës së Eurocontrol Network Manager, si Aeroporti i Tiranës ashtu edhe Albcontrol kanë përballuar me sukses fluksin e shtuar të fluturimeve. Raporti thekson se rreth 19% e vonesave lidhen me operacionet në tokë, përfshirë shërbimet aeroportuale dhe aktivitetin e kompanive ajrore.
Për të përballuar kërkesën në rritje, institucionet përgjegjëse kanë rënë dakord për një paketë masash që synojnë optimizimin e procedurave operative, forcimin e bashkëpunimit ndërmjet institucioneve dhe zgjerimin e kapaciteteve të furnizimit me karburant. Qëllimi mbetet rritja e efikasitetit të operimeve, duke garantuar njëkohësisht standardet më të larta të sigurisë.
