Më shumë se 140 vite pas udhëtimit legjendar që lidhi për herë të parë Europën me Lindjen, “La Dolce Vita Orient Express” do të rikthejë një nga itineraret më ikonike të historisë së udhëtimeve. Më 22 tetor 2026, treni luksoz do të niset nga Roma drejt Stambollit, në një rrugëtim pesëditor që sjell në kohët moderne magjinë e Orient Express-it të vitit 1883.
I konceptuar si një përvojë e ngadaltë dhe ekskluzive udhëtimi, itinerari ofron një ndërthurje të peizazheve spektakolare, historisë dhe kulturave të ndryshme europiane. Gjatë rrugës, pasagjerët do të ndalojnë në Venecia, Budapest, si dhe në qytetet rumune Brașov dhe Sinaia, përpara se të mbërrijnë në destinacionin final, Stamboll.
Brendësia e trenit është frymëzuar nga estetika italiane e viteve ’60 dhe ’70, epoka e famshme e “Dolce Vita”-s. Suitat dhe kabinat janë projektuar për të ofruar luks, elegancë dhe rehati maksimale, ndërsa eksperienca plotësohet me gastronomi të nivelit të lartë dhe shërbime premium gjatë gjithë udhëtimit.
Lexo edhe:
Nisja bëhet nga stacioni Roma Ostiense, ku udhëtarët mirëpriten në një sallon ekskluziv të dedikuar për Orient Express. Më pas, aventura vazhdon përmes disa prej peizazheve më të bukura të Europës, duke e kthyer vetë udhëtimin në destinacion.
Sigurisht, një eksperiencë e tillë ka edhe çmimin e saj. Biletat për këtë udhëtim unik nisin nga rreth 20 mijë euro për person, duke e renditur mes eksperiencave më luksoze hekurudhore në botë.
