Autoriteti i Konkurrencës ka konfirmuar se është duke shqyrtuar ankesat e qytetarëve lidhur me rritjen e çmimeve nga kompanitë celulare në vend.
Në një përgjigje zyrtare drejtuar një gazetareje që kishte paraqitur ankesë për rritjen e çmimit të kontratës nga Vodafone Albania, institucioni bën me dije se Komisioni i Konkurrencës ka vendosur hapjen e një hetimi të thelluar ndaj Vodafone Albania SHA dhe One Albania SHA në tregun me pakicë të shërbimeve celulare.
Sipas dokumentit, hetimi është miratuar me Vendimin nr. 1226, datë 18.11.2025, me qëllim verifikimin e praktikave të ndjekura nga dy operatorët kryesorë të telefonisë celulare në vend.
Autoriteti sqaron se gjatë procedurës së hetimit do të kryhet edhe vlerësimi i ankesës së paraqitur nga qytetarja, në përputhje me ligjin “Për mbrojtjen e konkurrencës”.
Pas marrjes së përgjigjes, gazetarja reagoi me një postim në rrjetet sociale, ku shkruan:
“Shteti i korruptuar favorizon edhe kompanite private…
Ose behet shembull qe ato te abuzojne
Te tilla jane edhe kompanite celulare qe operojne ne vend, bejne ca te duan me cmimet e kontratat, madje dhe muajin ta bejne me 25 dite.
Ndoshta asgje nuk do behet me kerkesen time, por per budallenj s’na bejne dot.”
Prej kohësh, abonentët e kompanive celulare kanë ngritur shqetësime për rritjen e tarifave dhe ndryshimet e kushteve të kontratave, ndërsa hetimi i Autoritetit të Konkurrencës pritet të zbardhë nëse ka pasur shkelje të rregullave të konkurrencës në tregun e telefonisë celulare.
