Në zemër të kryeqytetit të Shqipërisë, ndodhet Kalaja e Tiranës, një objekt i vjetër i restauruar vitet e fundit, duke u kthyer në një nga pikat më të frektuentuara nga vizitorë të shumtë vendas dhe të huaj. Kalaja e Tiranës ka dy hyrje, nga pedonalja, e cila përshkohet lehtësisht në këmbë, ose me makinë përmes parkimit të qendrës tregtare “Toptani”. Si dhe hyrja e dytë, nga ana e unazës, ngjitur me selinë e Partisë Demokratike.
Një rrugë me shkallë të ngjit deri në hyrjen e dytë të Kalasë, e cila për vizitorët që vijnë nga qendra e qytetit përmes pedonales shërben si dalje. Por hyrja klasike ndodhet pikërisht në këtë pikë, ku është gdhendur në murin kryesor edhe emri i këtij destinacioni, Kalaja e Tiranës.
Një pajton i ‘parkuar’ në anë i cili stoliset disa herë në vit në varësi të atmosferës festive, perfekt për të shkrepur foto me të dashurit tuaj.
Hyrja e Kalasë është dimensionuar taman si objekt historik, por me shumë gjallëri brenda saj, në të dy anët lulëzojnë biznese të ndryshme, nga kafene, dyqane e restorante të ndryshme me ushqim modern dhe tradicional.
Një guidë nëpër Kala
Në hyrje të Kalasë ndodhen dy lokalet e para që ofrojnë menu të ndryshme e për pasojë tërheqin edhe vizitorë të ndryshëm.
Oping’s cocktails e beer
Në anën e djathtë, në hyrje të Kalasë së Tiranës ndodhet bari i njohur “Oping’s cocktails e beer”, i frekuentuar më së shumti në orët e darkës. Por aty mund të gjesh plot vizitorë në çdo orë të ditës, veçanërisht paradite kur dielli bie më shumë se në çdo pikë tjetër.
“Oping’s” ka një menunë e tij antipasta të ndryshme, pica, burger, pasta apo dhe petulla. Darkat bëhen edhe më të bukura, ku shpesh herë në sfond luhet muzikë me një volum të pranueshëm nga dj të ndryshëm. Ku ka më mirë për të bërë gëzuar me miqtë tuaj.
Fluffy Home Crepe & more
Për të gjithë të apasionuarit pas krepave, në derë të Kalasë në anën e majtë gjeni pikërisht “Fluffy”. Aty përgatiten në çast krepa të freskët, ku klientët zgjedhin t’i marrin me vete ose të ulen për t’i shijuar në ambientet e jashtme, për të qenë më komodë, dhe për t’i shijuar sapo janë përgatitur.
Shendeverë
Si vetë emri në “Shendeverë”, këtu i gjeni të dyja, verë të mirë dhe hare, ‘vibe’ të mirë për të kaluar kohë cilësore me miqtë dhe familjarët tuaj. Ajo vjen në Kalanë e Tiranës si një zgjatim i kantinës “Çobo” në Berat, ku një familje shqiptare ka ndërtuar një markë prestigjioze të prodhimit të verërave.
Kjo kantinë ka bazën e saj në Dimal, ndërsa vreshtat për prodhimin e verëave ndodhen në kodrat e Beratit. Të huajt thonë që në “Shëndeverë” provojnë ushqime që nuk i kanë ngrënë kurrë më parë në Shqipëri. Ambienti i brendshëm ngjan me një shtëpi karakteristike shqiptare, ku në ditët e ftohta ndizet soba, ndërsa mbrëmjeve shpesh herë luhet dhe këndohet edhe muzikë live.
Ceren Ismet Shehu
Nëse keni drekuar vazhdimisht jashtë me të afërmit tuaj, një nga emrat më të shpeshtë që keni dëgjuar si sugjerim është Ceren Ismet Shehu. Vitet e fundit, ai ka hapur një rrjet restorantesh në disa pika të ndryshme të Tiranës, si dhe jashtë saj. Një prej tyre vjen pikërisht në zemër të Kalasë së Tiranës. Prej vitesh ky destinacion pret çdo ditë dhjetëra vizitorë vendas dhe të huaj, të cilët shijojnë ushqime tradicionale shqiptare, kryesisht të zonës së veriut, ku më karakteristike është flija e Kukësit.
Në anët e murit të këtij restoranti qëndrojnë të varura copëza të kostumeve popullore shqiptare, ndërsa ambienti të ofron ngrohtësi me një zjarr bubulak në mes të lokalit, i cili gjatë mujave të dimrit qëndron gjithmonë ndezur.
Këndi i shitjes së objekteve tradicionale
Nëse e viziton Tiranën për herë të parë, të dytë, të tretë do duash gjithmonë të marrësh me vete një objekt, me simbolet kombëtare, që kanë një domethënie të veçantë të lidhura me hartën e Shqipërisë ose portretin e heroit tonë, Gjergj Kastriot Skënderbeu. Një kënd që shet objekte të tilla ndodhet pikërisht në kala, përballë Ceren Ismet Shehut.
A do blinit bizhuteri në një Kala…pse jo? Chicarti Silver
Në atmosferën e një kohe cilësore, ose nëse je në një moment të fundit për të arritur në kohë, që të kapësh një festë ditëlindje dhe gjeje pak çfarë?! Ke harruar të blesh dhuratën. Chicarti Silver është një dyqan bizhuterish dhe syzesh që ndodhet në Kalanë e Tiranës.
Food Factory
Pica, sanduiçe, burgers dhe pasta me shije italiane, të gjitha të përgatitura në çast për t’u shijuar me miqtë tuaj. Food Factory është një hyrje e këtij viti në Kalanë e Tiranës, e vendosur mes Ceren Ismet Shehu dhe Bana’s Kalaja. Një nga motot e tyre është “Harroji lulet, bleji asaj një burger”. Thonë që janë burgers më të veçantë në Tiranë.
Nama Sushi
E çfarë është një rrjet restorantesh dhe baresh të ndryshme, nëse nuk ka një vend ku ti mund të hash sushi?! Nama Sushi prej vitesh në Kalanë e Tiranës, ka një menu të larmishme të servirjes së tyre. Një ambient i qetë, ku ti mund të kalosh kohë me miqtë brenda ose jashtë, restorantit.
Sipërmarrësja e këtij restoranti është një emër i njohur i medias në Shqipëri, Fjodora Fjora, e cila paralelisht me karrierën televizive ka zhvilluar edhe këtë markë për përgatitjen e sushive në Tiranë. Duke ndjekur një praktikë të restoranteve jashtë vendit, Nama Sushi ofron shpesh paketa të servirjes së sushive me një numër të caktuar të tyre. Për të gjithë ata që duan t’i shijojnë në shtëpi, Nama Sushi ofron edhe delivery.
“Bana’S Kalaja”.
Rrjeti i restoranteve “Bana’s’, themeluar nga moderatorja Arbana Osmani festoi para pak ditësh 2-vjetorin e tij. Dhe në vigjilje të këtij përvjetori të ri, u hap edhe pika më e re e “Bana’s” te Kalaja e Tiranës. Një zonë shumë e frekuentuar nga vizitorë të shumtë, ambienti ku ndodhet sot kjo pikë e re, ka qenë vazhdimisht një vend ku biznese të ndryshme janë vendosur përkohësisht në fushata të caktuara.
Megjithatë në një bisedë me Vip Travel, sipërmarrësja Arbana Osmani, shprehet se nëse publiku do i mirëpresë do të qëndrojnë këtu për një kohë të gjatë. Ky rrjet restorantesh ka të njëjtën menu në të gjitha pikat e tij, me panine të freskëta, pasta ëmbëlsira, ku ne të Vip Travel do veçonim Tiramisu me pistachio, e cila nuk duhet lënë pa provuar.
Cowboy candy shop
Një botë me ëmbëlsira për të zbukuar shëtitjen tuaj në Kalanë e Tiranës. Ky rrjet dyqanesh shet ëmbëlsira që nuk do t’i gjeni askund tjetër të gjitha në një vend. Mund të jetë një destinacion ideal për të blerë ëmbëlsira për një festë ditëlindjeje. Rruga drejt lumturisë dhe kujtimeve të paharruara kalon nga ëmbëlsirat…
Tartuf shop
Për të gjithë ata që dashurojnë tartufin, në këtë restorant çdo gatim ka një shije tartufi brenda saj. Vizitorët e huaj nuk mungojnë kurrë në këtë ambient. Ambienti është mjaft i ngrohtë dhe mikpritës. Kur ka tartuf, çdo pjatë kthehet në luks…
A e dini se:
-Tartufi është i pasur me anti oksidantë, ndaj vlerësohet edhe për shijet shëndetësore
-Ai rrit intensitetin e shijes së çdo ushqimi, nga pasta te mishi e deri te vezët
Porcelan studio Seferi
Memorizoni kujtimet tuaja në objekte porcelani. Gjithmonë e më shumë jemi larg kujtimeve të prekshme duke ruajtur në sirtarin tonë vetëm ato digjitale. Ky dyqan i vogël synon të mbajë gjallë këtë traditë, ku ju mund të gdhendni kujtime apo dhe personalizime të ndryshme për t’ia dhuruar dikujt. E veçanta e punimeve te “Seferi”, janë edhe simbolet kombëtare.
Orient Accessories
Një aksesor për të marrë me vete si kujtim nga udhëtimi në Tiranë, ose një dhuratë për të afërmit tuaj. Ky dyqan ofron bizheteri të ndryshme si dhe aksesorë të punuar me dorë.
Subashi Olive Oils
Jo vetëm vaj ulliri, por shumë më shumë produkte, të gjitha të lidhura me natyrën dhe vetë pemën e ullirit. Ajo ofron shumë produkte nga druri i ullirit për kuzhinën tuaj, të punuara të gjitha me dorë. Ju mund të zgjidhni edhe t’i personalizoni ato me një emër apo një simbol të caktuar. Një ide e mirë dhurate për shtëpi, teksa festat e fundvitit janë afër.
Illyrian Pantheon
Nën atmosferën e dhuratave, edhe ky dyqan ka të gjitha produktet që mund t’i marrësh me vete pa hezituar, dhe secila do të ishte një dhuratë e bukur. Mes tyre gjeni verë, kuti me çokollata, kuti shahu, objekte të gdhendura si dhe kompozime të ndryshme me disa produkte brenda.
Gzona
Nëse punon në një ambient kolegësh me të cilin bëheni shpesh për darkë, pa dyshim që mund të keni qenë njëherë te Gzona. Një ambient elegant me një menu me shumë shije brenda. Motoja e tyre është të risjellin për klientët evolucionin e traditës së vyer shqiptare të mikpritjes dhe ushqimit. Të premtet vijnë thuajse gjithmonë me muzikë live për miqtë e shtëpisë së Gzona’s.
Lezet
Pak Turqi në Kalanë e Tiranës. “Lezet” ka në menunë e saj gatime tradicionale mesdhetare, ku specialitet i servirjes janë kunefe e bakllava që sjellin aromë origjinale Stambolli. Ideale për t’u provuar teksa dhjetori është afër. Në ambientet e jashtme të këtij lokali ju bie në sy edhe një pus karakteristik dekorativ me çikrik, si në kohët e hershme.
Filari Wine Bar
Një ambient për të kaluar çdo kohë të ditës me të dashurit tuaj. Nga menuja e veçantë e mëngjesit deri te shijimi i verës, shoqëruar me antipasta të ndryshme në orët e vona të darkës. Motoja e tyre: Ne shërbejmë me dashuri…
Ciocolati Italiani
Thuajse çdo gjë në këtë lokal shërbehet e ëmbël. Nga krepat, tortat e ndryshme e deri te ëaffle që në këtë biznes janë karakteristik. Shija e ëmbëslirave nga vetë emri, është i frymëzuar nga kuzhina italiane, me recetat që i përmbahen bazës së Ciocolati Italiani në Itali, shkruan Vip Travel.
La Gioia
Ushqimet e detit, kanë ishullin e tyre në Kalanë e Tiranës, me emrin “La Gioia”. Nga vetë emri Italian, që në shqip përkthehet “Gëzimi”, ky restorant frymëzohet nga kuzhina italiane për përgatitjen e peshkut dhe produkteve të tjera të detit. Po ashtu në këtë restorant shpesh ka organizime të ndryshme ditëlindjesh dhe festash.
“N’çarshi”
Bari më skajor në dalje te Kalasë së Tiranës, ka një emër karakteristik shqiptar, ku mëngjeset nisin me një kafe nën rrezet e diellit, ndërsa darkat mbyllen me verë dhe muzikë të mirë, shpesh herë të luajtur nga Dj të ndryshëm.
Castle boutique hotel
Kalaja e Toptanëve, një fortesë byzantine e rindërtuar nga familja Toptani, ruan ende pjesë të mureve të saj në qendër të kryeqytetit, pikërisht në Kalanë e Tiranës. Sot kjo godinë ka marrë jetë me emrin “Castle boutique hotel”, që i jep jetë kësaj trashëgimie, duke ndërthurur gurët e lashtë me dizenjimin modern, ku gjen punime me dorë të frymëzuara nga historia shqiptare.
/Ky artikull u shkruajt nga Vip Travel, pjesë e Vip Magazine
