Detaje të reja kanë dalë në dritë rreth vrasjes së Artur Tushit, 44-vjeçarit shqiptar që u ekzekutua pak metra larg banesës së tij në qytetin Medelin të Kolumbisë.
Sipas autoriteteve kolumbiane, Tushi u qëllua me 11 plumba, duke gjetur vdekjen e menjëhershme, ndërsa autori i dyshuar, një 35-vjeçar me shtetësi venezueliane, u arrestua rreth 19 kilometra larg vendit të ngjarjes. Hetimet paraprake tregojnë se autori ishte vrasës me pagesë, i paguar në dollarë, çka ka ngritur dyshime serioze se bëhet fjalë për një përplasje të rrjeteve kriminale ndërkombëtare, të lidhura me trafikun e drogës.
Artur Tushi, i njohur në Shqipëri me nofkën “Qoti”, ishte me origjinë nga fshati Raboshtë në Lezhë. Ai kishte një të kaluar misterioze, ndërsa në vitin 2017, gjatë kohës që jetonte dhe punonte në Itali, u rrëmbye në Shqipëri, në zonën mes Fushë-Milotit dhe rrugës kombëtare Milot–Burrel. Gjatë atij incidenti, sipas Policisë Shqiptare, disa persona i prenë rrugën, i vendosën një qese në kokë dhe e mbajtën peng për disa orë, duke i vjedhur 200.000 lekë.
Lexo edhe:
Në atë kohë, Tushi nuk rezultonte me precedent penal as në Shqipëri, as në Itali. Megjithatë, hetimet ndërkombëtare që pasuan vrasjen e tij në Kolumbi, përmes Interpol-it, kanë zbuluar se Ekuadori dhe Spanja e kishin nën hetim për vepra penale si dhunë fizike dhe posedim droge.
Dyshohet se Tushi mund të ketë qenë i përfshirë në rrjete narkotrafiku ndërkombëtar, si një lidhje evropiane në zinxhirin e trafikut të drogës nga Amerika Latine drejt Europës. Vrasja e tij, e kryer në mënyrë profesionale dhe me gjakftohtësi, ka tronditur autoritetet dhe ka rikthyer vëmendjen mbi aktivitetet e mafies shqiptare në Amerikën Latine, ku vitet e fundit janë raportuar disa raste të ngjashme.
Hetimet për zbardhjen e plotë të ngjarjes vijojnë, ndërsa autoritetet kolumbiane janë në kontakt me partnerët ndërkombëtarë për të ndërtuar një profil të plotë kriminal të viktimës dhe për të identifikuar porositësit e vrasjes.
