Një tjetër viktimë e tragjedisë humanitare në Gaza është bërë akademiku, shkrimtari dhe poeti palestinez Omar Harb, i cili ndërroi jetë nga kequshqyerja pas muajsh nën bllokadën izraelite.
Harb, lektor universitar dhe figurë e njohur kulturore, kishte pësuar një rënie dramatike në peshë: nga 120 kilogramë para fillimit të luftës në tetor 2023, deri në më pak se 40 kilogramë në javët e fundit të jetës së tij.
Tre javë para vdekjes, ai kishte dhënë një intervistë për Al Jazeera ku tregonte vuajtjet e përditshme, mungesën e ushqimit dhe barnave, si dhe lutjet e tij të dëshpëruara për ndihmë mjekësore që nuk arriti kurrë. “Kam parë fotografitë e mia para dhe pas luftës dhe mendova: si është e mundur që të arrijë njeriu në këtë pikë?”, ishte shprehur ai.
Përveç vuajtjes personale, Harb përjetoi edhe një humbje të jashtëzakonshme: gjatë ofensivës humbi 26 anëtarë të familjes, mes tyre bashkëshorten, fëmijët dhe nipërit e mbesat.
Sipas raporteve të fundit, numri i viktimave nga uria në Gaza ka arritur në 370, ku shumica janë fëmijë, gra dhe të moshuar. Edhe pse akademikut iu premtua një evakuim gjatë Ramazanit të kaluar, më vonë ai mori njoftimin se nuk ishte përfshirë në listën e të larguarve.
