Pas shpalljes në kërkim ndërkombëtar, me 19 korrik finalizohet arrestimi i këngëtares Fjolla Morina. Ajo u arrestua në Prishtinë pranë dyqanit të saj të veshjeve, gjatë orarit të drekës.
Morina është e shpallur në kërkim ndërkombëtar nga Interpol Tirana, pasi mbi të rëndon akuza për trafikim të armëve dhe municioneve në Shqipëri. Gjykata e Kukësit e dënoi me 6 vite burg këngëtaren nga Kosova, Fjolla Morina, për veprën penale të “Trafikut të armëve dhe municionit”.
Morina ishte mbajtur në arrest shtëpiak në Kukës për një muaj, ndërkohë vetëm në prill të këtij viti Prokuroria pranë Gjykatës së Shkallës së Parë në Kukës ka depozituar vendimin për shpalljen në kërkim ndërkombëtar. Fjolla Morina dhe bashkëshorti i saj Fisnik Syla u arrestuan më 19 shtator 2020 në Pikën Kufitare të Morinës, pasi u kapën me dy armë me vete, shkruan Panorama Plus.
Lexo edhe:
Këngëtarja po udhëtonte me një makinë tip “Audi Q7”, ndërsa iu gjet një armë në çantë dhe një në bagazh. Në çantën e saj u gjetën dy pistoleta dhe 23 fishekë, teksa ajo më pas deklaroi se ishte shtatzënë, por që rezultoi se kishte gënjyer. Para se të arratisej, Fjolla Morina pranoi në gjykatë akuzën për “Trafik të armëve dhe municioneve”.
Fjolla deklaroi se bashkëshorti i ardhshëm dhe shoferi nuk kishin dijeni për armët, kështu që arriti t’i shpëtojë dhe ata u lanë të lirë. Që nga dita e arrestimit ka kaluar thuajse një javë dhe nuk ka asnjë reagim nga bashkëshorti i saj, biznesmeni Fisnik Sylaj. Mbase duhej t’i dilte në krah, t’i jepte kurajë, por ai ka zgjedhur të heshtë dhe ne nuk e dimë arsyen e kësaj zgjedhjeje. Avokati Fanol Krasniqi tha se këngëtarja është arrestuar para gjithë lagjes në mënyrë të dhunshme.
“Fjolla Morina është arrestuar në mënyrën më çnjerëzore të mundshme, pasi i dihej adresa e banimit, madje e njëjta ka edhe nënshtetësi. Fjolla Morina nuk është thirrur paraprakisht që të intervistohet apo t’i tregohet arsyeja e arrestimit. Ajo është arrestuar para të gjithë lagjes. Ajo nuk pranoi asnjë urdhëresë. Vetëm verbal ‘Kemi urdhëresë prej shtetit të Shqipërisë se është kërkuar ekstradimi për veprën të cilën je shpall fajtor’”, tha avokati Krasniqi.
Ai u shpreh se nuk ka marrë asnjë dokumentacion në lidhje me kërkesën e Prokurorisë për ekstradimin e Fjolla Morinës në Shqipëri. Avokati tha se ndaj këngëtares ende nuk është marrë një vendim i formës së prerë, pasi vendimi i Gjykatës së Kukësit për dënimin me 6 vite burg të Morinës, është apeluar nga ana e tyre në Gjykatën e Shkodrës.
Ndërkohë, ka edhe një fakt tjetër interesant. Fjolla Morina dhe prokurori i saj, Edmond Karriqi, kanë pasur të njëjtin fat. Të dy pas hekurave. Këngëtarja u arrestua pasi ishte në kërkim për armëmbajtje pa leje, ndërsa prokurori u ndalua për korrupsion. Edmond Karriqi disa muaj më parë ka pasur një përplasje me Gjykatën e Kukësit, pasi ka mbuluar çështjen e arrestimit të këngëtares së njohur Fjolla Morina.
Karriqi akuzohet nga SPAK për veprën penale “Korrupsioni pasiv i gjyqtarëve, prokurorëve dhe funksionarëve të tjerë të drejtësisë”. SPAK njofton se nga veprimet hetimore të kryera, janë siguruar dhe janë mbledhur prova konkrete, nga të cilat janë krijuar dyshime të arsyeshme se Karriqi, në cilësinë e drejtuesit të Prokurorisë pranë Gjykatës së Shkallës së Parë Kukës, ka kërkuar dhe ka marrë përfitime monetare të parregullta, me qëllim për të favorizuar disa persona të proceduar, të cilët kanë qenë duke u hetuar në Prokurorinë Kukës.
LAJMI I DY MUAJVE MË PARË PËR NDARJE ME BASHKËSHORTIN
Ndërkohë, rreth dy muaj më parë, disa media raportonin se Fjolla Morina mund të jetë ndarë nga bashkëshorti i saj, i cili thuhet se është një biznesmen i rëndësishëm që zotëron disa hotele dhe biznese të tjera. Nuk e dimë se nga mund të ketë dalë ky lajm, por i pyetur nga mediat, Fisnik Syla e mohoi ndarjen.
Më pas, ai publikoi foto me Fjollën duke kaluar fundjavën. Edhe ditën kur vajza e Fjollës mbushi 18 vjeç, rreth një javë më parë, ai nuk mungoi duke i bërë një urim publik për ditëlindje.
Një tjetër mister është edhe fakti që Fjolla Morina flitej që ishte shtatzënë. Ditën e arrestimit, ajo kishte veshur një fustan të gjerë dhe nuk kuptohej nëse ishte apo jo. Një video e publikuar pak javë më parë nga Fisniku, tregonte Fjollën duke fjetur dhe barku i saj ishte i rrumbullakosur.
Nuk dihet akoma nëse kjo është e vërtetë ose jo dhe nëse është kështu, atëherë Fjolla po qëndron në burg ndërkohë që është shtatzaënë. Kujtojmë që gjatë kohës kur Fjolla kërkohej nga Policia, ajo organizonte ceremoninë luksoze të martesës në Maldive me bashkëshortin aktual, Fisnik Sylaj, i cili ka pasur një familje dhe dy fëmijë para se të martohej me Fjollën.
Ai i ka siguruar asaj një jetë luksi dhe Fjolla tani jeton në një supervilë si dhe ka hapur biznesin e saj. Fisniku publikonte herë pas here në rrjete sociale foto të Fjollës duke evidentuar ngjashmërinë e gruas së tij me Kim Kardashian dhe krenohej me të, ndërkohë që tani ka pllakosur një heshtje totale, pas arrestimit të saj.
