Detaje të reja bëhen me dije nga ekzekutimi me armë zjarri i Çajup Selimit.
Selimi rezulton biznesmen në fushën e tregtimit të miellit me pakicë. Po ashtu në ekstraktin e QKB-së, vihet re se Selimi tregtonte edhe materiale ndërtimi, dhe artikuj të ndryshëm.
Selimi ka qenë sulmuar edhe më herët. Në vitin 2018 ai është paraqitur në Spitalin e Gjirokastrës si pasojë e plagëve të marra, pasi është goditur me mjete të forta nga 2 persona në qendër të qytetit të Tepelenës.
Selimi në atë kohë dëshmonte se e kishin sulmuar me leva hekuri dhe e kanë kërcënuar me thika e goditur me grushta, për arsye që nuk i ka të qarta.
Çajupi dhe të afërmit e tij kanë pranuar se situata ishte e përsëritur, pasi ishte hera e katërt që Çajup Selimi sulmohet në një mjedis publik, por në asnjë rast më parë nuk ka pasur të ndaluar.
Njoftimi i plotë i policisë:
Tepelenë/Informacion paraprak.
Rreth orës 21:15 në qytetin Tepelenës, në lagjen “15 Shtatori”, në rrethana ende të paqarta është plagosur me armë zjarri shtetasi Ç.S., rreth 45 vjeç, i cili ka humbur jetën në Spitalin Rajonal Gjirokastër si pasojë e plagëve të marra.
Menjëherë shërbimet e Komisariatit të Policisë Tepelenë dhe Forcat Shqiponja të DVP Gjirokastër kanë shkuar në vendngjarje dhe po krehin zonën për kapjen e autorit.
Ndërkohë janë ngritur disa pika kontrolli në hyrje dhe dalje të qytetit Tepelenë.
