Një ngjarje e rëndë ka ndodhur gjatë ditës së djeshme në zonën e Laprakës, ku një zjarr ka shkrumbuar plotësisht dy banesa, duke lënë pa strehë dy familje.
Në njërën prej banesave jetonte një nënë me katër fëmijët e saj, ndërsa në shtëpinë ngjitur banonin vjehrra dhe vjehrri i saj. Brenda pak minutash, flakët u morën gjithçka kishin ndërtuar me mund dhe sakrifica ndër vite.
Edhe pse përballeshin me kushte të vështira ekonomike, familjarët kishin arritur të ndërtonin dy banesa modeste, ku mund të jetonin dhe të rrisnin fëmijët e tyre. Por zjarri ua ktheu mundin e një jete në hi.
Lexo edhe:
Nëna dhe katër fëmijët e saj kanë mbetur tashmë në qiell të hapur, pa një çati mbi kokë dhe pa asnjë mundësi financiare për ta rindërtuar shtëpinë. Bashkë me ta, gjithçka kanë humbur edhe dy të moshuarit që jetonin në banesën ngjitur.
Mes rrënojave të nxira dhe sendeve të shkrumbuara, familja përballet sot me një realitet tragjik. Në vetëm pak çaste humbën strehën, sigurinë dhe gjithçka kishin mundur të krijonin.
Familja ka nevojë urgjente për ndihmë dhe solidaritet, në mënyrë që katër fëmijët dhe të afërmit e tyre të mos mbeten pa strehë.
