Shalqiri është sinonim i verës, por një kokërr e madhe mund të zërë gjysmën e frigoriferit dhe të zbutet përpara se ta konsumoni të gjithën. Një recetë virale në TikTok propozon një zgjidhje shumë më interesante: kthejeni gjysmën e tij në akullore.
Si përgatitet akullorja me shalqi
Priteni një shalqi të plotë përgjysmë. Në qendër të njërës gjysmë, hiqni me lugë një pjesë të tulit, duke krijuar një hapësirë të rrumbullakët.
Lexo edhe:
Mbulojeni gjysmën e shalqirit me qese plastike kuzhine dhe vendoseni në ngrirje për të paktën 24 orë. Gjysmën tjetër mund ta ruani për ta konsumuar ose përdorur në një recetë tjetër.
Pasi shalqiri të ketë ngrirë plotësisht, hidhni pak qumësht në zgavrën e krijuar. Mund të përdorni edhe qumësht kokosi.
Me një lugë, filloni të gërryeni ngadalë anët dhe fundin e pjesës së ngrirë, duke e përzier shalqirin me qumështin. Ndërsa masa bashkohet dhe fillon të marrë formën e akullores, shtoni gradualisht edhe pak qumësht.
Vazhdoni derisa të përftoni sasinë dhe konsistencën që dëshironi. Shërbejeni menjëherë në një tas të vogël ose vendoseni përsëri në ngrirje, nëse preferoni një teksturë më të fortë.
Ëmbëlsira është freskuese dhe e përshtatshme për ditët e nxehta. Tekstura rezulton kremoze, por ruan edhe grimca të vogla akulli, ndaj ngjan me një ndërthurje mes akullores dhe sorbetos.
Meqenëse shalqiri nuk ka një shije shumë intensive, qumështi që zgjidhni do të ndihet ndjeshëm në rezultatin përfundimtar. Qumështi i kokosit funksionon mirë, sepse aroma e tij kombinohet natyrshëm me freskinë e shalqirit.
Në disa versione të recetës shtohen edhe një ose dy lugë qumësht të kondensuar të ëmbëlsuar.
