Kanë qenë dy pasagjerë në makinën e Bledar Birçajt në momentin e ekzekutimit të tij në qytetin e Vlorës dy ditë më parë.
Detajet e reja janë zbardhur nga grupi i hetimit. Përveç efektivit të policisë Granit Deromema, në automjet me viktimën ndodhej edhe një 20-vjeçar që ka dalë nga dera e pasme, ndërkohë që identiteti i tij nuk bëhet ende i ditur.
Gjatë marrjes në pyetje, ai ka deklaruar se ka qenë i traumatizuar për shkak të plumbave të qitur nga armët e dy autorëve dhe nuk mbante mend thuajse asgjë nga ngjarja.
Lexo edhe:
Pistë kryesore e grupit të hetimit është e shkuara e viktimës në Spanjë. Ai rezulton i dyshuar si i përfshirë në një tjetër ngjarje në vitin 2011, por hetimet në lidhje me këtë çështje u pushuan për mungesë provash.
Së fundmi ai kishte qëndruar më shumë kohë në Spanjë prej nga bënte shpesh vajtje-ardhje nga Shqipëria. Në Vlorë nuk njihej si person problematik, por si biznesmen pasi ishte pronar i një lokali të quajtur “The Boss” të njohur në zonën e Lungomares.
Deri më tani në lidhje me këtë ngjarje janë shoqëruar më shumë se 15 persona për t’u marrë në pyetje. Ndërkohë në vendin e krimit policia ka gjetur më shumë se 30 gëzhoja. Dyshimet e uniformave blu janë se makina e autorëve mund të jetë fshehur në ndonjë garazh jo shumë larg zonës ku ndodhi vrasja pasi deri më tani nuk ka asnjë gjurmë prej tyre./abcnews
