Në Japoni nuk mjafton të kesh para për të blerë një makinë, por duhet të vërtetosh edhe se ke një vend ku ta parkosh. Që prej vitit 1962, me ligjin e quajtur Garage Act, çdo person që dëshiron të regjistrojë një automjet duhet të pajiset më parë me një “certifikatë garazhi” (Shako Shomeisho), e cila lëshohet nga policia lokale.
Pa këtë dokument makina nuk mund të marrë targa dhe blerja nuk finalizohet. Rregulli kërkon që vendi i parkimit të jetë jashtë rruge, brenda një distance prej 2 kilometrash nga banesa ose vendi ku do të përdoret makina, dhe të jetë i dokumentuar si pronë ose i marrë me qira.
Ky ligj është menduar për të lehtësuar trafikun dhe për të kursyer hapësirën në qytetet e mëdha japoneze, ku parkimi është një luks më vete. Përjashtime ka vetëm për automjetet e vogla të tipit “kei cars”, sidomos në zona rurale. Ky sistem e bën Japoninë një rast unik në botë, ku blerja e makinës nuk nis tek salloni i shitjes, por tek parkimi.
