“Mullixhiu, ky është emri i një restoranti shumë special në hyrje të digës së Liqenit Artificial. Vip Travel bisedoi me kuzhinierin Bledi Kola, i cili sapo futemi brenda na tregon edhe arsyen pse ka vendosur ta quajë kështu restorantin. Në ambientet e jashtme të tij ndodhet një mulli ku Bledi bashkë me stafin e tij, bluajnë drithërat për të bërë bukën që shërbehet për klientët e restorantit.
Në një bisedë me gazetarin Gurjan Doçi, shef Bledi tregon se të gjitha produktet që bluhen atyi kultivon në tokat e tij në fshatin e vendlindjes në Lezhë. “Të gjithë bukët që bëjmë ne, janë pa maja. Përveçse janë me lëndën e parë shqiptare, janë edhe pa maja. Një nga arsyet pse i kemi vendosur emrin Mulli, një nga nevojat që ka tregu është buka. Jemi munduar ta çojmë në nivelin e duhur të standardin e pjekjes, dhe produkteve të vendit. Problemi më i madh është plehu kimik që i hidhet drithërave që të rritet”, tregon Bledi.
Lexo edhe:
“Ne kemi edhe bozën. Bozë dikur është bërë me mel. Meli nuk mbillet më. Për momentin ne bëjmë bozë me misër. Ne bëjmë bozën me misrin kokërr të zier, të fermentuar”, shprehet Bledi duke treguar një tjetër specialitet të këtij restoranti dhe sekretet e përgatitjes së tij me evoluimin e përgatitjes.
Po si ka lindur pasioni i Bledit për kuzhinën, që sot përveçse profesion, e ka kthyer edhe në biznes, ku qëndron vetë në krye të të gjitha punëve, që nga mbjellja e produkteve që përdoren, gatimi dhe mikpritja e klientëve.
“Jam rritur në një familje që e ka pasur babën mësues dhe nëna ka qenë në shtëpi. Jam rritur në një familje ku ushqimi nuk ishte trend, por ishte nevojë. Kultivimi i perimeve, bërja e bukës në shtëpi, zënia e djathit, për Bledin ishin pjesë e rutinës. Mendoj që kjo është zanafilla që ka ushqyer embrionin për t’u bërë kuzhinier. Pastaj emigrova në Londër. Atje fillova punë pjatalarës. Sepse është një punë ku mund të integroheshe edhe pa ditur gjuhën, vetëm me gjuhën e trupit. Punova 6 muaj pjatalarës”, shprehet Bledi.
Më tutje në bisedë, Bledi shpjegon edhe arsyet që e shtynë të kthehet në Shqipëri. “Ika me kamion, u ktheva me avion. Kisha më shumë mend kur ika, se kur u ktheva. Dëshira ishte për të rikthyer patriotizmin, dashurinë përmes stomakut. Ishte ajo që më bëri më shumë që të kthehem në Shqipëri në vitin 2007, pas 7 vitesh”.
Bledi bën edhe një përmbledhje të shkurtër lidhur me hapjen e Mullixhiut, dhe historikun e tij në dekadën e fundit. Një e veçantë tjetër e këtij restoranti është edhe menuja “Metamorfoza”që sjell në tryezë receta nga e gjithë Shqipëria, me gatime tradicionale sipas krahinave të ndryshme.
“Mullixhiu është hapur në vitin 2016. Kontrasti i madh me zonën dhe ndjesinë e fshatit që të jep restoranti, nuk ka lidhje. Kur e kemi hapur kishim një lloj dileme. E kemi hapur bashkë me Altin Prengën. Pastaj u shkëput në vitin 2019. Në qershor nisën problemet, pasi njerëzit ikën. Ka shumë media ndërkombëtare që kanë shkruar për ne. Ajo që pëlqehet më shumë është menuja metamorfoza që shërbejmë që ka një përmbledhje të copëzave të Shqipërisë. Kemi flinë e Kukësit, kemi rushnicën”
Një sugjerim Bledi ka edhe për konsumin e produkteve të stinës, duke hequr një paralelizëm me veshjet sipas motit. “Përveç produktit vendor, duhet të përdoret edhe produkti i stinës. Kur më vijnë në dimër më kërkojnë domate në sallatë fshati, unë ju them pse nuk keni ardhur me pantallona të shkurtër?!”
