Drejtuesi i Acromax, Aldor Nini, ka publikuar sot në Instagram një bisedë me një motorrist të Wolt Albania, ku zbulohet një sjellje e papranueshme ndaj klientëve nga ana e shërbimit të shpërndarjes.
Në komunikimin e bërë publik, shihet se motoristi nuk dorëzon porosinë në adresën e saktë, ndonëse kjo është e specifikuar në aplikacion. Në vend që të ngjitet deri në zyrat e klientit, ai kërkon që klienti të dalë poshtë për të marrë porosinë. Kur klienti i kërkon shpjegim, duke pyetur përse duhet të dalë jashtë kur opsioni “deri në adresë” është aktivizuar në aplikacion, motorristi i përgjigjet me tallje: “O gjigand, mos e do në tavolinë?”.
Ky reagim i motorristit është një shkelje e hapur e rregullave të sjelljes profesionale dhe mungesë respekti ndaj klientit. Aldor Nini e ka cilësuar këtë sjellje si të papranueshme dhe ka njoftuar se do ta sinjalizojë si shkelje të rregullave të marrëdhënies me klientët.
Ky incident ngre shqetësime të mëdha për mënyrën si Wolt Albania menaxhon cilësinë e shërbimit të saj. Kur një klient paguan për dorëzim deri në adresën e plotë, kompania ka detyrimin ta ofrojë këtë shërbim në mënyrën e duhur. Refuzimi i motorristit dhe përçmimi i klientit tregojnë një problem të brendshëm, që mund të lidhet me mungesën e trajnimit, kontrollit dhe kujdesit për klientët.
Në tregjet e tjera ku Wolt operon, një sjellje e tillë do të shkaktonte pezullimin e menjëhershëm të motorristit. Në Shqipëri, mbetet të shihet nëse kompania do të marrë masa të menjëhershme për të adresuar këtë situatë, apo do të lejojë që trajtimi i klientëve të vazhdojë në këtë mënyrë.
