Në një ceremoni solemne me praninë e figurave të larta të politikës, përfshirë Kryeministrin Edi Rama, ministra, deputetë dhe ambasadorin e Kosovës, u zhvilluan sot homazhet për Servet Pëllumbi në Pallatin e Kulturës.
Gjatë ceremonisë, djali i të ndjerit mbajti një fjalim lamtumire të mbushur me emocione e dhimbje, duke e përshkruar babain e tij si “njeriun më të shtrenjtë” dhe një “shtyllë të jetës”. Ai theksoi se Servet Pëllumbi ishte një figurë me vlera të rralla, i drejtë, i qetë dhe i respektuar nga të gjithë.
Në fjalën e tij, ai kujtoi mësimet e babait për ndershmëri, dinjitet dhe forcë përballë vështirësive, duke thënë se këto parime do të mbeten trashëgimia më e madhe për familjen.
Lexo edhe:
“Çdo kujtim me të është një pasuri e paçmuar”, u shpreh ai, duke shtuar se babai i tij do të jetojë përgjithmonë përmes mënyrës se si familja do të jetojë dhe do të sillet.
Fjalimi u mbyll me një lamtumirë të ndjerë: “Lamtumirë profesor. Faleminderit për gjithçka na dhe. Do të jesh gjithmonë mes nesh. U prefsh në paqe.”
Fjalimi mes lotësh i Arbenit për të atin e ndjerë, Servet
FJALA E ARBEN PËLLUMBIT
I nderuar zoti kryeministër Rama, të nderuar kolegë deputetë, zotërinj ministra, i nderuar zoti ambasador i Kosovës, si dhe të gjithë ju që me marrjen e lajmit na keni qëndruar pranë, na keni shkruar apo na keni telefonuar. Në emër të familjes, ju falenderoj të gjithëve. Sot qëndroj para jush me një dhimbje të thellë në zemër për t’i dhënë lamtumirën njeriut më të shtrenjtë të jetës sonë. Është e vështirë të gjesh fjalët kur humbet një baba.
Humb një shtyllë të jetës tënde, një mbështetje të heshtur, një figurë që të ka udhëhequr me shembull dhe dinjitet. Babai ynë nuk ishte thjesht një prind. Ai ishte një njeri me vlerë të rrallë, i drejtë, i qetë dhe i respektuar nga të gjithë ata që patën fatin ta njohin. Ai na mësoi se jeta duhet jetuar me ndershmëri, me përgjegjësi dhe mbi të gjitha, me dashuri për familjen.
Na mësoi të qëndrojmë të fortë edhe kur jeta bëhet e vështirë, të mos ulim kokën përballë padrejtësive dhe të ruajmë gjithmonë dinjitetin. Çdo kujtim me të është një pasuri e paçmuar për mua dhe për ne. Fjalët e tij, këshillat, prania e qetë, të gjitha këto do të na shoqërojnë përgjithmonë. Sot dua të them me krenari që jam djali i tij.
Krenar për familjen që ai ndërtoi, për vlerat që na la dhe për dashurinë që na dhuroi pa kushte. Ai do të jetojë gjithmonë tek ne, në mënyrën si jetojmë, si sillemi dhe si do ta duam njëri-tjetrin. Largimi i tij ka lënë një boshllëk të madh, por gjithashtu ka lënë edhe një dritë të fortë, shembullin e jetës së tij. Dhe kjo dritë do të vazhdojë të na udhëheqë. Lamtumirë profesor. Faleminderit për gjithçka na dhe. Do të jesh gjithmonë mes nesh. U prefsh në paqe.
