Hetimet ndaj ish-kryeministrit Sali Berisha po hyjnë në fazën përfundimtare. Avokati Spartak Ngjela paralajmëron se janari dhe shkurti mund të shënojnë momentin e dënimit të tij në formë të prerë. Në analizën e tij, Ngjela flet për një proces penal që tashmë ka kaluar fazën politike dhe po shndërrohet në një çështje thelbësisht juridike, ku SPAK, sipas tij, është i vendosur të shkojë deri në fund. Thirrja e Berishës në Prokurorinë e Posaçme dhe sinjalet për akuza të reja ndaj familjes së tij, sipas Ngjelës, tregojnë se hetimi ka marrë një drejtim të pakthyeshëm. “A e mbani mend Saliun kur para një viti u kërkoi shqiptarëve me një klithmë prej të çmenduri që ata të armatoseshin? Beogradi ia kishte kërkuar. Tani kjo është vërtetuar nga shërbimet amerikane. Dhe tani kuptohet se Saliu ka dashur të sillte sërish në Shqipëri vitin 1997. Por Shqiptarët as që e përfillin fare. Po tani? Tani po kërkon me të gjitha mjetet t’i shpëtojë SPAK – ut. Por këtë e ka të pamundur. ASGJË nuk i bën dot Saliu SPAK – ut. Janari dhe muaji shkurt mund të jenë ditët e dënimit të tij në formë të prerë. Të shohim se si do të shkojë procesi i tij penal dhe, edhe për çështjen Partizani që sapo ka filluar. Por gjithsesi duhet ta vëmë në dukje se si do të ecë procesi penal, por shenjat janë se, përderisa, Saliu u thirr në SPAK para disa ditësh dhe kur doli ai foli pa përmbajtje për një akuzë të re që i ishte ngritur familjes Berisha, kuptohet se procesi penal kundër Berishës po ka një impenjim të plotë nga Prokuroria e Posaçme. Të shohim sepse çështja penale Berisha po kuptohet se ndërkohë ka hyrë në një proces penal historik”, shprehet Ngjela.
Plani i Ramës për t’i ‘lidhur duart’ SPAK
Gjithashtu Spartak Ngjela ka komentuar dhe lajmin se kryeministri Edi Rama po përgatit planin për izolimin e SPAK. Ngjela i quan lëvizjet e Ramës, të kota. Ngjela thekson se sado që të përpiqen politikanët shqiptarë për të mundur Amerikën, nuk e arrijnë dot, teksa këshillon Ramën që të marrë mësim nga historia dhe të largohet vetë nga politika, pasi ndryshe fundi i tij do të jetë jo i mirë. “Rama po kërkon të dobësojë SPAK. Domethënë kërkon të “mundë” Amerikën me kallashnikovët e Enver Hoxhës.. hahahahaha. Nuk kupton dot, që, ai vetë është vetëm te fjalët e kota që mezi i thotë. Ka pasur shumë diktatorë dhe pushtetarë të paaftë që nuk e kanë kuptuar dot që – është më mirë të ikësh pa pushtet, sesa të ikësh pa jetë”, shkruan Ngjela.
Lexo edhe:
Kriza e opozitës po mban Ramën në pushtet
Avokati ka përshkruar dhe panoramën aktuale të politikës shqiptare si një realitet të ngrirë, ku pushteti është përqendruar te një forcë e vetme dhe opozita, sipas tij, është praktikisht e zhdukur. “Gjendja politike sot në Shqipëri është një demokraci pa opozitë dhe po kuptohet që ajo në këtë vlerë do të vijojë të jetë, sepse socialistët sot nuk kanë kundërshtar. Partia kundërshtare e Partisë Socialiste është partia Demokratike. Partitë e tjera nuk konkurrojnë dot për pushtet, sepse nuk kanë përqindje të lartë ne elektoratin e Shqipërisë. Kurse Partia Demokratike gjithashtu nuk ka vota për të ardhur në pushtet, sepse ajo nuk ka kryetar të dobishëm për politikën e Shqipërisë, ngaqë kryetari i saj Sali Berisha është i shpallur nongrata në Shtetet e Bashkuara të Amerikës. Dhe kjo është arsyeja logjiko – politike që na thotë se Shqipëria sot është shtet me një parti dhe pa opozitë. Dhe kjo është gjithashtu edhe arsyeja që politika në Shqipëri ka ngrirë tek Partia Socialiste. Atëherë? Asgjë. Derisa kryetar i Partisë Demokratike të jetë një individ i cili është i shpallur nongrata në Shtetet e Bashkuara të Amerikës, socialistët do të kenë një parti absolute në Shqipëri.
Po Partia Demokratike nuk e kupton dot këtë, që të nxjerrë një kryetar tjetër? E ngremë këtë si pyetje sepse një parti që në funksion të kryetarit të saj është përjashtuar politikisht nga Amerika dhe nga Bashkimi Evropian, nuk mund të konkurrojë dot për pushtet në Shqipëri. Dhe kjo është arsye e fortë sepse sot Shqipëria po kërkon të jetë anëtare me të drejta të plota në Bashkimin Evropian. Por… Duke u nisur nga të gjitha rrethanat e sotme të politikës në Shqipëri, kuptohet se demokratët nuk kanë forcë për të larguar nga kryesia e Partisë Demokratike Sali Berishën. Po Berisha nuk e kupton këtë? Për Berishën nuk mund të flitet më për politike, sepse përderisa po qëndron kryetar i Partisë Demokratike në një kohë që është i papranueshëm në Perëndim, kuptohet që ai nuk është me interesin e Shqipërisë në aktivitetin e tij. Po Partia Demokratike nuk e kupton që me Sali Berishën kryetar të saj, ajo parti është e izoluar nga Bashkimin Evropian dhe nga Shtetet e Bashkuara të Amerikës? Ja, kjo është sot pyetja e të djathtës në Shqipëri, sepse pa forcën e Partisë Demokratike nuk ka asnjë forcë tjetër që të mundë Partinë Socialiste. Atëherë? Asgjë, sepse përgjigjja e pyetjes që bëmë është se, përsa kohë të jetë kryetar Sali Berisha, Partia Demokratike nuk ka asnjë mundësi që të vijë në pushtet. Atëherë përse po lufton Partia Demokratike? Për asgjë, sepse kështu siç është ajo po qëndron vetëm për të shpëtuar Saliun nga çështja penale që i është ngritur atij nga SPAK për korrupsion. Por na duhet të themi se kjo nuk është një politikë shteti dhe për shtetin, por është thjesht një politikë shpie dhe për shtëpinë tënde”, tha ai.
